இவற்றை உலமா சபை கவனத்திற்கொள்ள வேண்டும் என அகில இலங்கை மக்கள் காங்கிரஸின் தலைவரும் கைத்தொழில் மற்றும் வர்த்தக அமைச்சருமான ரிசாத் பதியுதீன் தெரிவித்தார்.
பொதுபலசேனா அமைப்பு குர்ஆன் அத்தியாயங்கள் சிலவற்றைக் குறிப்பிட்டு அகில இலங்கை ஜம்இய்யத்துல் உலமா சபையிடம் அவற்றுக்கான விளக்கங்களைக் கோரியிருப்பது தொடர்பில் கருத்து வினவிய போதே அமைச்சர் ரிசாத் பதியுதீன் விடிவெள்ளிக்கு இவ்வாறு தெரிவித்தார்.
அவர் தொடர்ந்தும் கருத்துதெரிவிக்கையில்;
நல்லாட்சி அரசாங்கம் நாட்டில் இனங்களுக்கிடையில் நல்லிணக்கத்தை ஏற்படுத்துவதற்கு பல்வேறு நடவடிக்கைகளை மேற்கொண்டு வருகிறது. ஆனால் ஒரே ஒரு விடயத்தில் மாத்திரமே கடந்த கால அரசாங்கத்தின் கொள்கையைப் பின்பற்றுகிறது.
அது பொதுபல சேனாவின் செயலாளர் ஞானசார தேரர் விவகாரத்திலும் மட்டக்களப்பு மங்களராம விகாரை அதிபதியின் விவகாரத்திலாகும். இனவாதத்தைத் தூண்ட முயற்சிக்கும் இவர்களை அரசாங்கம் கைது செய்து சிறையில் அடைக்க வேண்டும்.
முஸ்லிம்களை எதிரிகளாக எண்ணியிருக்கும் ஞானசார தேரர் குர்ஆன் விளக்கங்களை அறிந்து கொள்வதற்குத் தேவையில்லை. உலமா சபை தெளிவான விளக்கங்களை வழங்கினாலும் ஞானசார தேரர் அதனை ஏற்றுக்கொள்ளமாட்டார். அதில் மாற்றங்களைச் செய்து முஸ்லிம்களுக்கு எதிராக பல போராட்டங்களை முன்னெடுப்பார்.
பொதுபல சேனாவின் செயலாளர் மக்களால் நிராகரிக்கப்பட்ட ஒருவர். அவர் காவியுடை அணிந்திருப்பதினாலே மக்கள் அவரை மதிக்கின்றனர். இல்லையேல் அவர் பல சவால்களுக்குள்ளாகியிருப்பார். மக்களால் நிராகரிக்கப்பட்ட அவரது கடிதம் தொடர்பில் உலமா சபை அலட்டிக் கொள்ளத் தேவையில்லை.
சிறைக்குள் இருக்க வேண்டியவர்கள் சுதந்திரமாக நடமாட விடப்பட்டிருப்பதனாலேயே இன்று இனவாதம் தலையோங்கியுள்ளது.
குர்ஆனுக்கு விளக்கம் கோரியிருப்பது வேறோர் இனவாத முயற்சிக்கான ஏற்பாடாகும். எனவே உலமா சபையும் முஸ்லிம் சமூகமும் இச்சந்தர்ப்பத்தில் விழிப்பாக இருக்க வேண்டும் என்றார்.