ad34@hFacMC 
இலங்கைக்கு எதிரான சர்வதேச சவால்களுக்கு முகம் கொடுக்கவும், ஒன்றிணைந்த நாட்டுக்குள் இன ஐக்கியத்தை ஏற்படுத்தவும் பிரதமர் ரணில் விக்கிரமசிங்கவினால் மட்டுமே முடியும். ஜனநாயகத்தை ஏற்படுத்தியதன் விளைவாகவே நாட்டுக்கு எதிரான சவால்களை வெற்றிகொள்ள முடிந்தது என ஐக்கிய தேசிய முன்னணியின் வேட்பாளரும் அமைச்சருமான சம்பிக்க ரணவக்க தெரிவித்தார்.
கடந்த ஜனாதிபதித் தேர்தலின்போது தவறியேனும் மஹிந்த ராஜபக்ஷ வென்றிருந்தால் நாட்டில் மிகப்பெரிய குழப்பம் ஏற்பட்டிருக்கும். வடக்கில் தொடர்ந்தும் அடக்குமுறை கையாளப்பட்டிருந்தால் மற்றும் இராணுவ சப்பாத்துகளில் தமிழ் மக்களை அடக்கி வைத்திருந்தால் இன்று நாட்டில் மீண்டும் ஒரு உரிமைக்கான கலவரம் தலை தூக்கியிருக்கும் எனவும் அவர் குறிப்பிட்டார்.
நேற்று நுகேகொடையில் நடைபெற்ற மக்கள் கூட்டத்தின் போதே அவர் மேற்கண்டவாறு குறிப்பிட்டார். அவர் அங்கு மேலும் கூறுகையில்,
கடந்த ஜனாதிபதி தேர்தலின் போது ஏற்பட்ட ஆட்சி மாற்றமானது நாட்டில் ஜனநாயகத்தையும் ,மக்கள் தமது உரிமைகளை வென்றெடுக்க நல்லதொரு வாய்ப்பையும் வழங்கியது. அதேபோல் நாட்டின் தேசிய பாதுகாப்பை பலப்படுத்தவும், நாட்டுக்கு எதிராக எழுந்துள்ள சர்வதேச அழுத்தங்களில் இருந்து விடுபடவும் இந்த ஆட்சிமாற்றம் நல்லதொரு சந்தப்பமாக அமைந்துள்ளது.
எனினும் தவறியேனும் கடந்த ஜனாதிபதி தேர்தலின் போது மஹிந்த ராஜபக்ஷவின் கூட்டணி வெற்றி பெற்றிருந்தால் இந்த நாடு மிகப்பெரிய சவால்களுக்கு முகம் கொடுக்கவேண்டிய நிலைமை ஏற்பட்டிருக்கும்.
குறிப்பாக ஐரோப்பிய ஒன்றியமும் அமெரிக்காவும் எமக்கு எதிரான பலத்த நடவடிக்கைகளை முன்னெடுத்திருக்கும். எமது இராணுவ வீரர்களின் உயிர் தியாகத்தின் மூலம் வென்றெடுத்த இந்த நாட்டின் சமாதானத்துக்கு மிகப்பெரிய அடி விழுந்திருக்கும். எமது இராணுவத்தை சர்வதேச கூண்டில் நிறுத்தி தண்டனை வழங்கியிருப்பார்கள். அதேபோல் நாடு இரண்டாக பிரிந்து நாட்டில் மீண்டும் ஆயுத கலாசாரம் தலை தூக்கியிருக்கும்.
ஆனால் இந்த நிலைமையில் இருந்து நாட்டையும் நாட்டைக் காப்பாற்றிய இராணுவ வீரர்களையும் இந்த ஆட்சி மாற்றமே காப்பாற்றியது. அதேபோல் ஐக்கிய தேசியக் கட்சியின் முயற்சியும் ஜனாதிபதி மைத்திரிபால சிறிசேனவின் தலையீடுமே நாட்டை சரியான பாதையில் முன்னெடுத்து செல்கின்றது.
வடக்கில் புலிகளின் ஆதிக்கம் மீண்டும் தலை தூக்கியுள்ளதாக மஹிந்த பிரச்சாரம் செய்கின்றார். ஆனால் வடக்கில் தொடர்ந்தும் அடக்குமுறை கையாளப்பட்டிருந்தால் மற்றும் இராணுவ சப்பாத்துகளில் தமிழ் மக்களை அடக்கி வைத்திருந்தால் இன்று நாட்டில் மீண்டும் ஒரு உரிமைக்கான கலவரம் தலை தூக்கியிருக்கும். எனினும் ஆட்சி மாற்றத்துடன் வடக்கில் ஜனநாயகத்துக்கு முன்னுரிமை வழங்கப்பட்டதன் மூலமும் நாட்டில் சகல மக்களுக்குமான உரிமைகளை பலப்படுத்தியதன் மூலமுமே பயங்கரவாத அச்சுறுத்தலில் இருந்து நாடு விடுபட்டுள்ளது.
அதேபோல் உலகின் பொருளாதார ரீதியில் வளர்ச்சி கண்ட நாடுகள் எம்முடன் எந்தவித பொருளாதார உறவுகளையும் மேற்கொள்ளவில்லை. மாறாக சர்வதேச விசாரணை, போர்க் குற்றச்சாட்டுகள் மற்றும் நாட்டின் மனித உரிமை மீறல்கள் என்ற விடயங்களை மட்டுமே சுட்டிக்காட்டி வந்தனர். ஆனால் ஆட்சி மாற்றத்தின் பின்னர் பிரதமர் ரணில் விக்கிரமசிங்க தலைமையிலான ஐக்கிய தேசியக் கட்சியின் ஆட்சியில் நாம் இழந்திருந்த சர்வதேச நம்பிக்கையினையும் அவர்களது உதவிகளையும் மீண்டும் பெற்றுள்ளோம். அதேபோல் இலங்கை மீதான சர்வதேச அழுத்தங்களையும் குறைத்துள்ளோம்.
எனவே இலங்கை மீதான சர்வதேச சவால்களுக்கு முகம் கொடுக்கவும், ஒன்றிணைந்த நாட்டுக்குள் இன ஐக்கியத்தை ஏற்படுத்தவும் ஐக்கிய தேசியக் கட்சியால் மாதிரமே முடியும். பிரதமர் ரணில் விக்கிரமசிங்கவினால் மட்டுமே நாட்டில் ஜனநாயகத்தை ஏற்படுத்த முடியும் என்றார்.