ஜனாதிபதி மாளிகையில் நிலத்துக்கு அடியில் அமைக்கப்பட்டிருந்த சொகுசு மாளிகையானது, இரகசியமாக அமைக்கப்பட்ட மாளிகையல்ல. மாறாக ஜனாதிபதி ஒருவரின் பாதுகாப்பு கருதி பாதுகாப்பு சபை, இராணுவ தளபதி உள்ளிட்டோரின் ஆலோசனைக்கு அமைவாக அமைக்கப்பட்ட வதிவிடம் மட்டுமே என முன்னாள் பாதுகாப்புச் செயலாளர் கோத்தபாய ராஜபக் ஷ தெரிவித்துள்ளார்.
2009 ஆம் ஆண்டுக்கு முன்னரேயே இந்த நிலக்கீழ் பாதுகாப்பு வதிவிடம் அமைக்கப்பட்டது.அப்போதிருந்த சூழலில் ஜனாதிபதி ஒருவரின் பாதுகாப்புக் கருதியே அது நிர்மாணிக்கப்பட்டது.
எவரினதும் தனிப்பட்ட தேவைக்காக அது அமைக்கப்படவில்லை என்பதை புரிந்துகொள்ள வேண்டும் எனவும் கோத்தாபய குறிப்பிட்டுள்ளார். ஜனாதிபதி மாளிகையில் நிலத்துக்கு கீழ் அமைக்கப்பட்டுள்ள ஆடம்பர மாளிகை தொடர்பில் ஊடகங்களில் செய்திகள் வெளியிடப்பட்டு வரும் நிலையில், அது தொடர்பில் கருத்து வெளியிடுகையிலேயே கோத்தபாய ராஜபக்ஷ இதனைத் தெரிவித்துள்ளார்.
இது தொடர்பில் தொலைபேசி ஊடாக விளக்கமளித்துள்ள கோத்தபாய ராஜபக்ஷ தெரிவித்துள்ளதாவது,
உண்மையில் இது இரகசியமாக அமைக்கப்பட்ட பதுங்குக் குழியோ அல்லது மாளிகையோ கிடையாது. அப்போதிருந்த சூழலில் ஜனாதிபதியின் பாதுகாப்பை உறுதிச் செய்யும் பொறுப்பு எமக்கிருந்தது. அதன்படி பாதுகாப்பு சபையும், இராணுவ தளபதிகளும் எம்மிடம் முன் வைத்த பரிந்துரைகளுக்கு அமைவாகவே ஜனாதிபதி மாளிகையில் நிலத்துக்கு கீழ் ஒரு பாதுகாப்பன வதிவிடத்தை அமைத்தோம். இது ஒன்றும் இரகசியமாக அமைக்கப்பட்டது கிடையாது.
அப்போதிருந்த சூழலை மையப்படுத்தியே இந்த தீர்மானம் எடுக்கப்பட்டிருந்தது. இப்போது வேண்டுமானால் இந்த வதிவிடம் தேவையற்றதாக கருத முடியும். எனினும் அப்போது புலிகளுக்கு வான் வழியாக வந்து தாக்கும் திறன் இருந்த போதே இந்த நிலக் கீழ் வதிவிடம் தயார் செய்யப்பட்டது.
புலிகள் முதன் முதலாக ஆகாய மார்க்கமாக கொழும்புக்கு வந்து குண்டு வீச்சை நடத்திய போது அவர்களது இலக்கு ஜனாதிபதி மாளிகையாகவே இருந்தது. எனினும் இடையில் அவர்கள் அதனை மாற்றி களனி திஸ்ஸ மின்சார நிலையத்தின் மீது குண்டு வீசிவிட்டுச் சென்றிருந்தனர்.
இந் நிலையில் யுத்தம் இடம்பெற்றுக்கொண்டிருத்த காலப்பகுதியிலேயே அந்த நிலக் கீழ் வதிவிடம் அமைக்கப்பட்டது. யாருடைய தனிப்பட்ட தேவைக்காகவும் அது அமைக்கப்படவில்லை. யாரேனும் ஜனாதிபதியாக பதவி வகிப்பவரின் பாதுகாப்புக்காகவே அமைக்கப்பட்டது. ஏனெனில் அப்போது ஜனாதிபதி ஒருவரை பாதுகாப்பது மிக்க பொறுப்பு வாய்ந்த விடயமாக இருந்தது. இந் நிலையில் இந்த விடயத்தை இப்படி மிகப் பிரசித்தமாக கலந்துரையாடுவது தவறானது.
உண்மையில் புலிகளின் விமானம் வரும் போது ஜனாதிபதியை தூக்கிக்கொண்டு ஒவ்வொரு இடமாக எம்மால் ஓட முடியாது. அதனாலேயே எமது பாதுகாப்பு சேவைக்கு இப்படியான ஒரு நிலக் கீழ் வதிவிடம் தேவைப்பட்டது. அதனால் நாமே அந்த வதிவிடத்தை அமைத்தோம். என்றார்.