ad34@hFacMC 
இலங்கையின் போர்க்குற்றங்கள் தொடர்பில் ஐக்கிய நாடுகள் சபை வெளியிடும் விசாரணை அறிக்கை இலங்கை இராணுவத்தை பழிதீர்க்கும் வகையில் அமையும். அதேபோல் பாரதூரமான விளைவுகளை ஏற்படுத்தும் என நம்புவதாக தூய்மையான ஹெல உறுமய கட்சியின் தலைவரும் பாராளுமன்ற உறுப்பினருமான உதய கம்மன்பில தெரிவித்தார்.
அதிகாரப்பகிர்வு விடயத்தை சர்வதேச அரங்கில் தீர்க்க முயற்சிப்பது ஏன்? தமிழர் பிரச்சினைக்கு புதிய அரசியல் அமைப்பு எதற்காக? இப்போதிருக்கும் அரசியல் அமைப்பின் மூலம் தீர்க்க முடியாத தமிழ் மக்களின் பிரச்சினை என்ன? எனவும் அவர் கேள்வி எழுப்பினார்.
தூய்மையான ஹெல உறுமைய கட்சியின் செய்தியாளர் சந்திப்பு நேற்று கொழும்பில் இடம்பெற்றபோது அதில் கலந்துகொண்டு உரையாற்றுகையிலேயே அவர் மேற்கண்டவாறு குறிப்பிட்டார்.
அவர் மேலும் கூறுகையில்,
ஐக்கிய நாடுகள் சபையின் மனித உரிமைகள் பேரவையின் கூட்டத்தொடர் இப்போது ஆரம்பமாகியுள்ளது. இதில் மிகவும் பயங்கரமான சம்பவங்கள் நடந்தேறியுள்ளன. அதாவது ஐக்கிய நாடுகள் மனித உரிமை பேரவையில் வெளிவிவகாரத்துறை அமைச்சர் மங்கள சமரவீர உரையாற்றுகையில் நாட்டுக்கு அச்சுறுத்தலான விடயங்களை தெரிவித்துள்ளார்.
இலங்கையில் தமிழ் மக்களின் பிரச்சினைகளை தீர்க்க புதிய அரசியல் அமைப்பை உருவாக்கப் போவதாக அவர் தெரிவித்துள்ளார். ஆனால் தேர்தல் காலத்தில் பிரதமர் ரணில் விக்கிரமசிங்க தெரிவிக்கையில் 13ஆம் அரசியல் அமைப்பினுலுள்ளேயே தமிழ் மக்களின் பிரச்சினைகளுக்கு தீர்வை தேடுவதாக தெரிவித்தார்.
ஆனால் வெளிவிவகார அமைச்சர் மங்கள சமரவீர இப்போது தெரிவித்திருக்கும் கருத்து பிரதமர் ரணிலின் கருத்துக்கு முற்றிலும் முரணாகவுள்ளது. ஆகவே மங்கள சமரவீர இலங்கைக்கு வந்தவுடன் பாராளுமன்றத்துக்கும் நாட்டுக்கும் விளக்கமளிக்க வேண்டும். அதேபோல் இப்போதிருக்கும் அரசியல் அமைப்பில் தீர்க்க முடியாத தமிழ் மக்களின் பிரச்சினை என்ன, புதிய அரசியல் அமைப்பில் அதை எவ்வாறு தீர்க்கப்போகின்றீர்கள் என்பதை தெளிவாக குறிப்பிட வேண்டும்.
அதேபோல் இலங்கையின் மனித உரிமைகள் தொடர்பில் தலையிட சர்வதேச தரப்பினருக்கு பொறுப்பு உள்ளது.ஏனெனில் மனித உரிமைகள் தொடர்பில் சர்வதேச உடன்படிக்கைகளில் இலங்கையும் கைச்சாத்திட்டுள்ளதால் அவற்றை ஏற்றுக்கொள்ள வேண்டும். ஆனால் அதிகாரப் பகிர்வு தொடர்பில் ஆலோசனைகளை பெறவோ அதிகாரப் பகிர்வை மேற்கொள்ளவோ எந்தவொரு சர்வதேச உடன்படிக்கையிலும் இலங்கை கைச்சாத்திடவில்லை.
அதேபோல் இலங்கையில் அதிகாரப் பகிர்வை மேற்கொள்ள சர்வதேசத்துக்கு எந்த அதிகாரமும் இல்லை. அவ்வாறு இருக்கையில் அதிகாரப்பகிர்வை மேற்கொள்வதாக சர்வதேச தரப்பிடம் தெரிவிக்கவேண்டிய அவசியம் இல்லை.
இலங்கையில் உள்நாட்டு பிரச்சினையை சர்வதேச அரங்கிற்கு கொண்டுசெல்வது ஏன். நாளை (இன்று ) வெளிவரவிருக்கும் ஜெனிவா அறிக்கை மிகவும் பயங்கரமானதாகும். எமது இராணுவத்தை தண்டிக்கும் வகையில் ஏதேனும் கருத்துக்கள் முன்வைக்கப்படலாம் என்ற சந்தேகம் எமக்கு உள்ளது. அவ்வாறு ஏதும் சம்பவங்கள் நடைபெறுமாயின் எமது இராணுவத்தை காப்பாற்றும் வகையில் “பொறுப்பு துறப்பு” சட்டமூலத்தை பாராளுமன்றத்தில் கொண்டுவர தீர்மானித்துள்ளோம்.இந்த சட்டமூலம் ஒன்றும் புதிய விடயம் அல்ல.
மூன்று சந்தர்ப்பங்களில் நாம் இந்த சட்டமூலத்தை பயன்படுத்தியுள்ளோம். 1815ஆம் ஆண்டு சிங்கள முஸ்லிம் கலவரத்தின் போது முதலில் கொண்டுவரப்பட்டது. அதன் பின்னர் 1977 இல் நடைபெற்ற கலவரத்தின் போது குழப்பங்களை தடுக்க அரசதரப்பு ஏதேனும் தவறுகள் செய்திருந்தால் அதில் இருந்து பாதுகாப்பு படையினரை காப்பாற்றவும் 1978 இல் ஜே.வீ.பி கலவரத்தின் போதும் இந்த சட்டமூலம் கொண்டுவரப்பட்டது.
ஆகவே வெளிவரவிருக்கும் அறிக்கையில் இராணுவத்தை தண்டிக்கும் வகையில் ஏதேனும் விடயங்கள் முன்வைக்கப்படுமாயின் எமது இராணுவத்தை காப்பாற்ற இம்முறையும் பாராளுமன்றத்தில் இந்த சட்டமூலத்தை கொண்டுவருவோம். எமது உயிரை காப்பாற்றிய இராணுவ வீரர்களை காப்பாற்ற எம்மாலான சகல முயற்சிகளையும் கையாள்வோம் என்றார்.