நாடளாவிய ரீதியில் பாடசாலைகளில் மூன்றாம் தவணைப் பரீட்சை நடைபெற்று வரும் நிலையில் மன்னார் கல்வி வலயத்தினால் நேற்று முன்தினம் செவ்வாய்க்கிழமை இடம்பெற்ற தரம் 2 மற்றும் 3 க்கான இஸ்லாம் பாட பரீட்சைக்குரிய வினாத்தாள்களில் பாரதூரமான எழுத்துப் பிழைகள் இடம்பெற்றிருந்ததாக முன்னாள் பாராளுமன்ற உறுப்பினர் ஏ.எச் .எம். அஸ்வர் கடும் அதிருப்தி தெரிவித்துள்ளார்.
குறித்த வினாத்தாளில் ‘நபி’க்கு ‘நரி’ என்றும் ‘தாய்’க்கு ‘நாய்’ என்றும் அச்சு பிழைகள் ஏற்பட்டிருந்ததாகவும் இது இஸ்லாத்தை அவமதிக்கும் வகையில் அமைந்திருப்பதாகவும் தெரிவித்துள்ள அஸ்வர் இது தொடர்பில் ஜனாதிபதி மைத்திரிபால சிறிசேன, பிரதமர் ரணில் விக்கிரமசிங்க மற்றும் முன்னாள் ஜனாதிபதி மஹிந்த ராஜபக்ஷ ஆகியோரின் கவனத்திற்கு கொண்டுவரும் வகையில் அவர்களுக்கு எழுத்து மூலம் அறிவிக்கவுள்ளதாகவும் அவர் குறிப்பிட்டுள்ளார்.
இது தொடர்பில் அவர் மேலும் கூறுகையில்,
மன்னார் வலயக் கல்வி அலுவலகத்தினால் இரண்டாம் தர மாணவர்களுக்காக தயாரிக்கப்பட்ட இஸ்லாம் பாட வினாத்தாளில் முதலாவது வினாவில் இணைக்குக எனும் பகுதியில் ஐந்து கேள்விகளும், அதற்குப் பொருத்தமான பதில்களும் குறிப்பிடப்பட்டுள்ளன.
அதில் ஐந்தாவது இடத்தில் ‘நபியவர்களின் தாய்’ என்பதற்கு பதிலாக ‘நபியாவர்களின் நாய்’ என அச்சிடப்பட்டுள்ளது.
அதேபோன்று மூன்றாம் தரத்திற்காக தயாரிக்கப்பட்ட இஸ்லாம் பாட வினாத்தாளில் சரியான விடையின் கீழ் கோடிடுக பகுதியில் கேட்கப்பட்ட மூன்றாவது கேள்வியில் ‘நபி (ஸல்) அவர்களின் தாயாரின் பெயர் ‘ என்பதற்கு பதிலாக ‘நரி (ஸல்) அவர்களின் நாயாரின் பெயர் ’ என அச்சிடப்பட்டுள்ளது. இந்த சம்பவம் கண்டனத்துக்குரியதாகும் என்றார்.