ஸ்ரீலங்கா சுதந்திர கட்சியின் கொள்கை ஐக்கிய தேசிய கட்சிக்கு தாரைவார்க்கப்பட்டுள்ளது. உண்மையான சுதந்திரக் கட்சியின் கொள்கையுடன் பண்டாரநாயக்கவின் சமாதிக்கு முன்னால் செல்வதை கௌரவமாக நினைக்கின்றேன் என பாராளுமன்ற உறுப்பினர் நாமல் ராஜபக்ஷ் தெரிவித்தார்.
ஒன்றிணைந்த எதிர்க்கட்சின் பாதயாத்திரை நேற்று ஹொரகொல்ல பகுதியே தாண்டும்போது ஊடகவியலாளர்களால் கேட்கப்பட்ட கேள்விக்கு பதிலளிக்கையிலேயே நாமல் ராஜபக்ஷ இவ்வாறு தெரிவித்தார்.
அவர் அங்கு தொடர்ந்து கூறுகையில்,
உண்மையான சுதந்திர கட்சியின் கொள்கையுடன் கூடிய ஆட்சியை ஏற்படுத்தவே நாங்கள் பாதயாத்திரை மேற்கொண்டு செல்கின்றோம். இன்று சுதந்திரக்கட்சியின் கொள்கை ஐக்கிய தேசிய கட்சிக்கு தாரைவார்க்கப்பட்டுள்ளது. அத்துடன் மக்கள் மீது சுமையை ஏற்படுத்தி, மீனவர்களை நிர்க்கதிக்குள்ளாக்கியுள்ள மக்கள் விரோத இந்த ஆட்சியை வீட்டுக்கு அனுப்பி மக்கள்மயமிக்க ஆட்சியை ஏற்படுத்துவோம்.
அத்துடன் எமது பேரணியில் செல்வோர் ஸ்ரீலங்கா சுதந்திர கட்சியின் நிறுவுனர் எஸ். டபிள்யு.ஆர்.டி.பண்டாரநாயக்கவின் சமாதிக்கு கல்லெறிவார்கள் என முன்னாள் ஜனாதிபதி சந்திரிகா குமாரதுங்க எண்ணியது தவறாகும். ஸ்ரீலங்கா சுதந்திரக் கட்சியை விட்டு முன்னாள் ஜனாதிபதி சந்திரிகா பண்டாரநாயக்க குமாரதுங்க வெளியேறும் போது தனது தந்தை மஹிந்த ராஜபக்ஷ கட்சியில் இருந்தார். கட்சியின் கொள்கையே அவரை பாதுகாத்தது.
அத்துடன் கட்சியின் கொள்கையை பாதுகாக்க போராடும் நாங்கள் கடசியின் நிறுவுனரான பண்டாரநாயக்கவின் சமாதிக்கு முன்னால் செல்லும்போது மகிழ்ச்சியாக இருக்கின்றது. அதனை கௌரவமாக நினைக்கின்றோம். அத்துடன் இந்த பாதயாத்திரை காலில் வீக்கம் வரும்வரை இடம்பெறும் என ஜனாதிபதி தெரிவித்துள்ளார். சுதந்திர கட்சியன் கொள்கையை ஐக்கிய தேசிய கட்சிக்கு தாரை வார்த்துக் கொடுப்பதாயின் கால் வீங்கும் வரையல்ல, உயிர் பிரியும் வரை போராடுவோம் என்றார்.