ad34@hFacMC 
முன்னைய ஆட்சியில் இடம்பெற்றதாக கூறப்படும் ஊழல் மோசடிகள் தொடர்பில் தொடர்ச்சியான முறைப்பாடுகளை தற்போதைய புதிய அரசாங்கம் மூலம் வெளிப்படுத்தும் நடவடிக்கை தொடர்கின்றது. முன்னைய ஆட்சியில் முக்கிய பிரமுகர்கள் பலரின் ஊழல்கள் தொடர்பிலான ஆதாரங்கள் எம்மிடம் இருக்கின்றன. ஊழலுக்கு எதிரான எமது வேட்டை ஆரம்பமாகிவிட்டது என்று மக்கள் விடுதலை முன்னணியின் தலைவர் அனுர குமார திஸாநாயக்க தெரிவித்தார்
முன்னைய அரசாங்கத்தின் முக்கிய உறுப்பினர்களான பாதுகாப்பு செயலாளர் கோத்தபாய ராஜபக்ஷ, முன்னாள் அமைச்சர் பசில் ராஜபக் ஷவிற்கும் எதிரான பாரிய குற்றச்சாட்டுக்கள் முன்வைக்கப்பட்டு வருகின்ற நிலையில் இது தொடர்பில் ஜே.வி.பி. யின் செயற்பாடுகள் எவ்வாறு அமையுமென வினவிய போதே அவர் மேற்கண்டவாறு தெரிவித்தார்.
அவர் மேலும் குறிப்பிட்டதாவது,
கடந்த பத்து ஆண்டுகளில் ஜனாதிபதி மஹிந்த ராஜபக்ஷவின் அரசாங்கத்தில் மக்களின் சொத்துக்கள் நாட்டின் வளங்கள் எவ்வாறு சூறையாடப்பட்டன என்பது தொடர்பில் தற்போது அறியக்கிடைக்கின்றது. கோடிக்கணக்கான சொத்துக்களை ஒரு குடும்பம் மட்டும் சூறையாடி அனுபவித்து வந்துள்ளது. இலங்கைக்குள் பல ஏக்கர் நிலப்பரப்பில் ஆடம்பர வீடுகளும் சொகுசு ஹோட்டல்களும் அமைத்து சுகபோக வாழ்க்கையினை இவர்கள் வாழ்ந்து வந்துள்ளனர். அரசாங்கத்திற்குள் இருந்தும் அமைச்சர்கள் தற்போது ஆட்சி மாற்றத்தின் பின்னர் நடந்த உண்மைகளை வெளிச்சத்திற்கு கொண்டு வருகின்றனர்.
இலங்கையின் பிரபல ஊடகவியலாளர்களின் கொலை தொடர்பிலும் கடத்தல்கள் தொடர்பிலும் முன்னாள் பாதுகாப்பு செயலாளர் கோத்தபாய ராஜபக்ஷ நேரடியான தொடர்பினை கொண்டுள்ளார் என்ற குற்றச்சாட்டானது மிகவும் பாரதூரமானது. நாட்டின் ஜனநாயகத்திற்காக போராடும் ஊடகவியலாளர்களை கொலை செய்ய அரசாங்கம் திட்டம் தீட்டியிருக்குமாயின் அதுவே மஹிந்த ராஜபக்ஷ ஆட்சியின் அராஜகத்தினை வெளிச்சத்திற்கு கொண்டு வரும் செயற்பாடாகும்.
அதேபோல் முன்னாள் ஜனாதிபதி மஹிந்த ராஜபக்ஷ குடும்பத்தின் முக்கிய உறுப்பினர்கள் சிலருக்கு எதிராக ஊழல் மோசடி குற்றச்சாட்டினை நாம் முன்வைத்திருந்தோம். அவை தொடர்பான ஆதாரங்கள் அனைத்தும் எம்மிடம் உள்ளன. அதேபோல் மேலும் பல குற்றங்கள் தொடர்பில் சகல ஆதாரங்களும் எம்மிடம் உள்ளன. அவை தொடர்பில் முறைப்பாடுகள் முன்வைக்கவுள்ளோம். முன்னாள் அமைச்சர் பஷில் ராஜபக் ஷ, நாமல் ராஜபக் ஷ மற்றும் அஜித் நிவாட் கப்ரால் போன்றோர்களின் ஊழல் தொடர்பில் முறையிட்டுள்ளோம். நாளை (இன்று) விடுதலைப்புலிகளின் பிரதான தலைவர்களில் ஒருவரான (கே.பி) குமரன் பத்மநாதனுக்கு எதிராக உயர் நீதிமன்றில் முறைப்பாட்டினை செய்யவுள்ளோம். இந்த பட்டியல் மிக நீளமானது.
அதேபோல் ஆட்சி மாற்றம் ஏற்பட்டவுடன் பழைய விடயங்களை மறைத்து மக்களை ஏமாற்றும் நடவடிக்கை இத்தோடு முடிவுக்கு கொண்டு வர வேண்டும். மக்கள் விடுதலை முன்னணி தனது வேட்டையினை ஆரம்பித்து விட்டது. நூறு நாட்களில் தேசிய அரசாங்கம் என்ன செய்ய போகின்றது என்பது எமக்கு தெரியாது. ஆனால் மக்கள் விடுதலை முன்னணி தனது கடமையினை செய்யும். மக்களின் சொத்துக்களையும் நாட்டின் சொத்துக்களையும் தனி நபர்கள் சூறையாடுவதை நாம் வேடிக்கை பார்க்க மாட்டோம் எனவும் அவர் குறிப்பிட்டார்.
-Verakesari-