ad34@hFacMC 
எட்டாவது பாராளுமன்றத்திற்கு தெரிவு செய்யப்பட்டுள்ள புதிய முஸ்லிம் பாராளுமன்ற உறுப்பினர்களை விழிப்பூட்டும் செயற்றிட்டத்தினை அகில இலங்கை ஜம்இய்யதுல் உலமா மேற்கொள்ள வேண்டும் என அம்பாறை மாவட்ட உலமா சபையின் முன்னாள் செயலாளரும், அரசினர் ஆசிரியர் கலாசாலை விரிவுரையாளருமான அஷ்ஷெய்க் எப்.எம்.ஏ.அன்ஸார் மௌலானா கடிதம் மூலம் கோரிக்கை விடுத்துள்ளார்.
எட்டு விடயங்களை உள்ளடக்கி, அகில இலங்கை ஜம்இய்யதுல் உலமாவின் தலைவர், செயலாளரை விளித்து எழுதப்பட்டுள்ள அவரது கோரிக்கைக் கடிதத்தின் பிரதிகள் தேசிய ஷுரா கவுன்சில், கிழக்கு முஸ்லிம் கல்விப் பேரவை என்பனவற்றுக்கும் அனுப்பி வைக்கப்பட்டுள்ளன. அக்கடிதத்தில் சுட்டிக்காட்டப்பட்டுள்ளதாவது,
எட்டாவது பாராளுமன்றத்திற்கு மொத்தம் 15 முஸ்லிம் உறுப்பினர்கள் தெரிவு செய்யப்பட்டிருந்தாலும், ஏழாவது பாராளுமன்றத்தில் 19 உறுப்பினர்கள் அங்கம் வகித்தனர். அந்தவகையில் முஸ்லிம் உறுப்பினர்களின் எண்ணிக்கையில் வீழ்ச்சியேற்பட்டுள்ளது. பிரபல முஸ்லிம் அமைச்சர்கள் உட்பட முன்னாள் உறுப்பினர்கள் ஏன் தோல்வி கண்டனர் என்பது ஆய்வுக்குட்படுத்தப்படவேண்டும்.
தனித்துவ அரசியலை மேற்கொண்டுவரும் தமிழ் தேசியக் கூட்டமைப்பு 16 ஆசனங்களுடன், நாட்டின் மூன்றாவது சக்தியாக தோற்றம்பெற்றுள்ளது. இதேவேளை, தனித்துவமான முஸ்லிம் கட்சியொன்று ஒரேயொரு ஆசனத்தைப் பெற்றிருப்பது ஏன்?
நிரந்தர அரசியல் திட்டம் இந்நாட்டில் முன்வைக்கப்படும் போது, தமிழ்த் தேசியம் வலுவான குரலெழுப்புவதற்கும், முஸ்லிம் தேசியம் வலுவற்ற குரலாக, கணக்கெடுக்கப்படாத குரலாக தோன்றுவதற்கும் இது வழிவகுக்கலாம்.
இவ்விடயத்தில் புதிய முஸ்லிம் பாராளுமன்ற உறுப்பினர்களின் நிலைப்பாடு எவ்வாறு அமையப் போகின்றது?
2015 ஆம் ஆண்டு ஜனவரி 8 ஆம் திகதி முதல் நாட்டில் புதிய அரசியல் கலாசாரம், நல்லாட்சி என்ற சொற்பதங்கள் அடிக்கடி பாவிக்கப்பட்டுவரும் நிலையில், ‘முஸ்லிம் தலைமைகள் ஒற்றுமைப்படுங்கள்’ என்ற கோரிக்கை முன்வைக்கப்படும் போதெல்லாம் தலைமைத்துவங்கள் வேறுபட்டிருக்கலாம், முஸ்லிம் மக்கள் ஒற்றுமைப்படுங்கள் என்று நொண்டிச்சாட்டு கூறப்படுகின்றது.
இதுகுறித்து தீர்க்கமான அரசியல் நிலைப்பாட்டுக்கு வருவது வரவேற்கத்தக்கது. இதன் ஆரம்பமாக தேசிய நலன்கள் குறித்து பாராளுமன்றத்தில் விவாதிக்கப்படும்போது, ‘வேற்றுமைக்கு மத்தியில் ஒற்றுமை’ என்ற புதிய அரசியல் கலாசார ஒழுங்குமுறையை முஸ்லிம் பாராளுமன்ற உறுப்பினர்கள் கடைப்பிடிக்கும் வகையில் ஒழுக்கக் கோவை உருவாக்கப்பட்டு,
‘முஸ்லிம் பாராளுமன்ற உறுப்பினர்களின் ஒன்றியம்’ உருவாக்கப்படல் வேண்டும். முஸ்லிம் பாராளுமன்ற உறுப்பினர்கள் இலக்கு, தூரநோக்கு என்பனவற்றை அடிப்படையாகக் கொண்டு எதிர்வரும் 2020 ஆம் ஆண்டு வரை பயணிக்க வேண்டும். முஸ்லிம் சிவில் அமைப்புக்களின் வழிகாட்டல் ஆலோசனையுடன் ஐந்தாண்டுத் திட்டமொன்றை தயாரிக்க வேண்டும். இதற்கேற்றவகையில் முஸ்லிம் கவுன்சில், ஜம்இய்யதுல் உலமா, ஷுரா கவுன்சில் ஆகிய அமைப்புக்களுடன் இணைந்து முழுநாள் செயலமர்வுகளை நடத்துவது வரவேற்கத்தக்கது. தேர்தல் வாக்குறுதிகள் வருடாந்த வேலைத்திட்டத்தில் உள்ளடக்கப்படுகின்றனவா? இல்லையா? என்பது குறித்த மதிப்பீடு, கணிப்பீட்டினை மேற்கொள்வது அவசியமாகும்.
இது தேசிய நீரோட்டத்தில் முஸ்லிம் விவகாரம் சமாந்தர ரீதியில் கவனஞ்செலுத்தப்பட வழியேற்படும் என எதிர்பார்க்கப்படுகின்றது. இதற்காக துறைசார் நிபுணர்கள், முஸ்லிம் கல்வியியலாளர்கள் ஆகியோர் முஸ்லிம் பாராளுமன்ற ஒன்றியத்துடன் இணைந்து தொண்டர் அடிப்படையில் பணியாற்ற முன்வரவேண்டும்.
அபிவிருத்தி அரசியல், உரிமை அரசியல் இரண்டும் சமாந்தரமாக செல்லத்தக்க வகையில் முஸ்லிம் அமைச்சர்கள் புரிந்துணர்வுடன் பணியாற்றும் அதேவேளை,
‘கனவான் அரசியல் செல்நெறி’ புதிய அரசியல் கலாசாரத்தில், நல்லாட்சியில் பங்களிப்புச் செய்யும் வகையில் காத்திரமான ஒருமுகப்படுத்தப்பட்ட திசைமுகப்படுத்தல் செயற்பாடுகள் முன்னெடுக்கப்படல் வேண்டும். எதிர்கால முஸ்லிம் அரசியல், தேர்தல் நடைமுறைகளில் முஸ்லிம் பாராளுமன்ற பிரதிநிதித்துவம் பாதிக்கப்படாத வகையில் வினைத்திறன்மிக்க அரசியல் மயப்படுத்தலுக்கு இளைஞர் சமூகத்தை வழிநடத்தும் தலைமைத்துவப் பயிற்சி, திறன் விருத்திப் பயிற்சி போன்றவற்றில் பிரதேச சமூக ஸ்தாபனங்களோடு இணைந்து செயற்பட வேண்டும். அத்துடன் அதற்கான நிதியொதுக்கீடுகளை மேற் கொள்ள முன்வரவேண்டும்.
முஸ்லிம் பாராளுமன்ற உறுப்பினர்கள் இஸ்லாமிய சன்மார்க்கக் கடமைகள், அழகிய முன்மாதிரிகள், பல்லின சமூக கலாசாரங்களிடையே நல்லிணக்கம், சகவாழ்வு போதனைகளை இறுக்கமாக செயற்படுத்துவதோடு,
எச்சந்தர்ப்பத்திலும் இஸ்லாமிய தனித்துவத்தை விட்டுக் கொடுக்காது பணியாற்ற முன்வர வேண்டும் என்றும் விபரிக்கப்பட்டுள்ளது.