ad34@hFacMC 
இந்தியாவுடனான நட்புறவை கடந்த அரசாங்கம் முறித்துக் கொண்ட நிலையில் புதிய அரசு நட்புறவை புதுப்பித்துக்கொள்ள எடுக்கும் நடவடிக்கைகள் வரவேற்கப்படுவதற்குரியதாகும் எனத் தெரிவித்த பெருந்தோட்டத்துறை அபிவிருத்தி அமைச்சர் லக்ஷ்மன் கிரியெல்ல, எமது எதிர்கால பொருளாதார மேம்பாட்டுக்கு இந்தியாவின் பங்களிப்பு அத்தியாவசியமானதாகுமென்றும் தெரிவித்தார்.
தமிழக அரசாங்கத்துடனும் நட்புறவை வலுப்படுத்திக் கொள்ள வேண்டியது அவசியமானதாகும் என்றும் அவர் சுட்டிக்காட்டினார்.இது தொடர்பாக அமைச்சர் லக்ஷ்மன் கிரியெல்ல மேலும் தெரிவிக்கையில்,
அயல் நாடான இந்தியாவுடன் நெருங்கிய நட்புறவை பேணுவது என்பது எமது வெளிநாட்டுக் கொள்கையின் முக்கியத்துவமானதாகும்.ஆனால் கடந்த அரசாங்கம் இந்தியாவுடனான நட்புறவை முறித்துக்கொண்டது.
இலங்கை பின்பற்றிய அணி சேரா கொள்கையை கைவிட்டு பிழையான வெளிநாட்டுக் கொள்கையை கையாண்டது.இதனால் உலகில் தனித்து விடப்பட்ட ராஜ்ஜியமாகவும் அரசியல் கலாசாரம் மழுங்கடிக்கப்பட்ட நாடாகவும் எமது நாடு மாறியது.
புதிய ஜனாதிபதி மைத்திரிபால சிறிசேன மற்றும் பிரதமர் ரணில் விக்கிரமசிங்க தலைமையிலான அரசு இந்தியாவுடன் நட்புறவை மேம்படுத்த நடவடிக்கைகளை எடுத்துள்ளது.அதன் முதற்கட்டமாக வெளிவிவகார அமைச்சர் மங்கள சமரவீர இந்தியாவுக்கு விஜயத்தை மேற்கொண்டுள்ளார். இது வரவேற்புக்குரியதாகும்.
இதன் மூலம் எமது பொருளாதாரத்தை மேம்படுத்திக் கொள்ள முடியும்.தெற்காசியாவின் அரசியல் ஸ்திரத்தன்மைக்கும் இரு தரப்பு நல்லுறவு அத்தியாவசியமானதாகும்.அதேவேளை தமிழ் நாட்டு மாநில அரசுடனும் நட்புறவை வலுப்படுத்திக் கொள்ள வேண்டுமென்றும் அமைச்சர் லக்ஷ்மன் கிரியெல்ல தெரிவித்தார்.