– ஏ.ஆர்.ஏ.பரீல் –
நாடெங்கும் முறையற்ற விதத்தில் வக்பு சட்டத்துக்கு முரணாக பயன்படுத்தப்படும் வக்பு சொத்துக்களை மீட்டெடுத்து சமூகத்தின் நலன்களுக்குப் பயன்படுத்துவதற்கான திட்டங்களை வகுப்பதற்கு நடவடிக்கைகளை மேற்கொண்டுள்ளதாக வக்பு சபையின் தலைவர் சட்டத்தரணி எஸ்.எம்.எம்.யாஸீன் தெரிவித்தார்.
முறையற்ற விதத்தில் பள்ளிவாசல் நிர்வாகிகள் பயன்படுத்தும் வக்பு சொத்துகள் தொடர்பில் வினவியபோதே வக்பு சபையின் தலைவர் யாஸீன் இவ்வாறு தெரிவித்தார். அவர் தொடர்ந்தும் கருத்து தெரிவிக்கையில்,வக்பு சொத்துக்கள் பெறுமதிமிக்கவை.
அவை அல்லாஹ்வின் சொத்துக்களாகும். வக்பு சட்டத்தின் கீழ் சொத்துக்களைக் கண்காணிக்கும் அதிகாரம் வக்பு சபைக்கு வழங்கப்பட்டுள்ளது. வக்பு சொத்துக்களிலிருந்து கிடைக்கும் வருமானம் முஸ்லிம்களில் தேவையானவர்களுக்குப் பயன்படுத்தப்பட வேண்டும்.
நாட்டில் இன்று அதிகமான வக்பு சொத்துக்கள் பள்ளிவாசல் தர்கா நிர்வாகிகளினால் முறையற்ற வகையில் குத்தகைக்கு வழங்கப்பட்டுள்ளன. நிர்வாகிகளின் உறவினர்களுக்கு மிகவும் குறைந்த வாடகைக்கு வழங்கப்பட்டுள்ளன. பள்ளிவாசல் நிர்வாக சபையின் பதவிக்காலம் 3 வருடங்களாகும்.
அதனால் மூன்று வருடங்களுக்கே வக்பு சொத்துக்கள் குத்தகைக்கு வழங்கப்பட வேண்டும். ஆனால் பல இடங்களில் 99 வருட குத்தகைக்கு வக்பு சொத்துக்கள் வழங்கப்பட்டுள்ளன. இவற்றை மீட்டெடுப்பதற்காக முயற்சிகளில் வக்பு சபை ஈடுபடவுள்ளது. இதற்கான திட்டங்கள் வகுக்கப்படவுள்ளன.
வக்பு சட்டம் மீறப்பட்டால் உரியவர்களுக்கு நீதி மன்றம் மூலம் தண்டனை பெற்றுக் கொடுக்கப்படும். அதிகமான நிர்வாகங்கள் வக்பு சொத்துக்களிலிருந்து கிடைக்கும் வருமானத்தை ஒழுங்காக வெளியிடுவதில்லை. வக்பு சபைக்கு சமர்ப்பிப்பதில்லை. வருமானம் ஒழுங்காகக் காட்டப்படவேண்டும்.
கிடைக்கும் வருமானத்தில் 6% முஸ்லிம் நலன்புரி நிதியத்துக்கு ஒதுக்கப்பட வேண்டும். இவ்வாறே வக்பு சட்டம் தெரிவிக்கிறது. இந்த 6% வீத வருமானம் வக்பு சபைக்கு அனுப்பி வைக்கப்பட வேண்டும். முஸ்லிம் சமூகத்துக்குள் ஏற்படும் சமய கலாசார பிரச்சினைகளுக்கான தீர்வுகளை வக்பு சட்டத்தின் மூலமே பெற்றுக்கொள்ள வேண்டும்.
இதை விடுத்து எமது சமய கலாசார மற்றும் பள்ளிவாசல் பிரச்சினைக்கு தீர்வுகள் பெற்றுக்கொள்ள பொலிஸ் நிலையம் செல்வது தவிர்க்கப்பட வேண்டும். எமது பிரச்சினைகளை நாமே எமக்குள் தீர்த்துக் கொள்ள வேண்டும்.
சமூக மீள் கட்டமைப்புக்கான வழி வகைகள் அனைத்து தரப்பினரையும் கலந்தாலோசித்தே மேற்கொள்ளப்பட வேண்டும். பள்ளிவாசல் நிர்வாகங்கள் கூடிய கவனம் செலுத்த வேண்டும் என்றார்.