மகன் வளர்த்த புறாவைக் காணவில்லை என தேடிச்சென்ற தந்தை ஒருவர்மீது பக்கத்து வீட்டுக்காரப் பெண் கத்தியால் குத்தியுள்ளார். படுகாயமடைந்த அவர் வாழைச்சேனை ஆதார வைத்தியசாலையில் அனுமதிக்கப்பட்டதாக வாழைச்சேனை பொலிஸார் தெரிவித்தனர்.
இச்சம்பவம் கடந்த திங்கட்கிழமை இடம்பெற்றுள்ளது. பிறைந்துரைச்சேனை முகைதீன் பள்ளிவீதியில் வசிக்கும் 50 வயது நிரம்பிய குடும்பஸ்தரே இவ்வாறு கத்திக்குத்துக்கு இலக்காகி வைத்தியசாலையில் அனுமதிக்கப்பட்ட நபராவார்.
சம்பவ தினமான அன்று குறித்த தந்தையின் மகன் தான் வளர்த்த புறாவைக் காணவில்லை என்றும் இறுதியாக பக்கத்து வீட்டின் கூரையில் கண்டதாகவும் தெரிவித்துள்ளார்.
மகனின் தகவலின் படி பக்கத்து வீட்டுக்குச் சென்று காணாமல்போன புறாவைப்பற்றி தந்தை விசாரிக்கவே எதிர்பாராத விதமாக அந்த வீட்டின் உரிமையாளரான பெண் தந்தையின் மீது கத்தியால் குத்தி காயப்படுத்தியுள்ளார்.
காயங்களுக்குள்ளாகிய குறித்த தந்தை வாழைச்சேனை ஆதார வைத்தியசாலையில் அனுமதிக்கப்பட்ட அதேவேளை இத்தாக்குதல் சம்பவத்துடன் தொடர்புடைய மேலதிக விசாரணைகளை வாழைச்சேனை பொலிஸார் முன்னெடுத்து வருகின்றனர்.