தம்புள்ளை ஹைரியா பள்ளிவாசலுக்கென்று நகர அபிவிருத்தி சபை ஒதுக்கியுள்ள காணியை தவிர்த்து அதற்கப்பாலுள்ள முஸ்லிம்களிடமிருந்து நகர அபிவிருத்தி அதிகார சபை 1982 ஆம் ஆண்டு சுவீகரித்துக் கொண்ட காணியைப் பெற்றுத் தருமாறு தம்புள்ள பள்ளிவாசல் நிர்வாகம் முஸ்லிம் சமய விவகார மற்றும் தபால், தபால் சேவைகள் அமைச்சர் எம்.எச்.ஏ.ஹலீமிடமும் அரச தொழில் முயற்சி அபிவிருத்தி அமைச்சர் கபீர் ஹாஷிமிடமும் வேண்டுகோள் விடுத்துள்ளது.
தம்புள்ள பள்ளிவாசலை தற்போதுள்ள காணியிலிருந்து அகற்றிக் கொள்வதற்காக நகர அபிவிருத்தி அதிகார சபை மதுபானசாலைக்கு எதிரே காணியொன்றினை ஒதுக்கியுள்ளதையடுத்தே பள்ளிவாசல் நிர்வாகிகள் இவ்வேண்டுகோளை இரு அமைச்சர்களிடமும் விடுத்துள்ளனர்.
தம்புள்ள ஹைரியா பள்ளிவாசல் நிர்வாக சபை உறுப்பினர் எஸ்.வை.எம்.சலீம்தீன் இது தொடர்பில் விடிவெள்ளிக்கு கருத்து தெரிவிக்கையில், நகர அபிவிருத்தி அதிகார சபை 1982 ஆம் ஆண்டு தம்புள்ளையில் முஸ்லிம்களின் காணி 6 ஏக்கரைச் சுவீகரித்தது. இக்காணி வெற்றுக்காணியாகவே இருக்கிறது.
தற்போது பள்ளிவாசலுக்கு ஒதுக்கப்பட்டுள்ள காணி மதுபானசாலைக்கு எதிரே அமைந்துள்ளதால் பள்ளிவாசலை அவ்விடத்துக்கு அகற்றிக்கொள்ள முடியாது.
தற்போது பள்ளிவாசலைச் சூழ வாழும் தமிழ், முஸ்லிம், சிங்களக் குடும்பங்களுக்கும் குறிப்பிட்ட 6 ஏக்கரில் தலா 20 பர்ச் வீதம் வழங்கப்பட வேண்டுமெனவும் அகற்றப்பட்ட இந்து கோயிலுக்கும் காணி வழங்கப்பட வேண்டுமெனவும் அமைச்சர்களிடம் கோரிக்கை விடுத்துள்ளோம்.
இதேவேளை புதிய காணியில் அரசாங்கம் பள்ளிவாசலை நிர்மாணித்துத்தர வேண்டுமெனவும் முஸ்லிம் சமய விவகார மற்றும் தபால், தபால் சேவைகள் அமைச்சர் இதற்கான ஏற்பாடுகளை மேற்கொள்ள வேண்டுமெனவும் கோரிக்கை விடுத்துள்ளோம் என்றார்.