ஐக்கிய மக்கள் சுதந்திர முன்னணியின் குருணாகல் மாவட்ட பாராளுமன்ற உறுப்பினர் எங்கே? ஏன் அவர் வரவு செலவுத் திட்ட விவாதத்தில் கலந்து கொள்ளவில்லை என்று ஐக்கிய தேசியக் கட்சியின் குருணாகல் மாவட்ட பாராளுமன்ற உறுப்பினர் நளின் பண்டார ஜயமகே நேற்று பாராளுமன்றத்தில் மஹிந்த அணியைப் பார்த்து கேள்வியெழுப்பினார்.
நளின் பண்டார எம்.பி. இவ்வாறு கேள்வியெழுப்பியதையடுத்து ஆளும்கட்சியினர் ஊ சத்தம் எழுப்பி மேசையில் தட்டினர். இதேவேளை மஹிந்த ஆதரவு அணியினரும் கூச்சலிட்டனர். அத்துடன் பலத்த சிரிப்பொலியும் எழுந்திருந்தது.
வரவு–செலவுத் திட்டம் சமர்ப்பிக்கப்பட்ட கடந்த 20 ஆம் திகதி முன்னாள் ஜனாதிபதியும் குருணாகல் மாவட்ட பாராளுமன்ற உறுப்பினருமான மஹிந்த ராஜபக்ஷ சபையில் சமுகமளித்திருந்தார்.
எனினும் கடந்த 21 ஆம் திகதி சனிக்கிழமை முதல் நேற்று புதன்கிழமை வரை ஒன்பது தினங்கள் இடம்பெற்ற விவாதங்களில் ஒரு தினமேனும் அவர் பாராளுமன்றத்தில் சமுகமளித்திருக்கவில்லை.
2016 ஆம் நிதியாண்டுக்கான வரவு–செலவுத் திட்டத்தின் மீதான விவாதத்தின் நேற்றைய இறுதி தினம் வரையில் அவர் விவாதத்தில் கலந்துகொண்டிராத நிலையிலேயே நளின் பண்டார எம்.பி. மேற்கண் டவாறு கேள்வியெழுப்பினார்.