பல தசாப்த காலமாக இலங்கையில் புரையோடிப் போயுள்ள இனப் பிரச்சினைக்கான தீர்வில் இந்தியாவின் பங்களிப்பு மிகவும் முக்கியமாக காணப்படுகிறது.
அதனால் இனப்பிரச்சினைக்கான தீர்வில் முஸ்லிம் மக்களின் அபிலாசைகளும் உள்வாங்கப்பட வேண்டும்.
இதனை இந்தியா உறுதி செய்ய வேண்டும் என அகில இலங்கை மக்கள் காங்கிரஸின் தலைவரும் கைத் தொழில் மற்றும் வர்த்தக அமைச்சருமான றிஷாத் பதியுதீன் இந்திய வெளிவிவகார அமைச்சர் சுஷ்மா சுவராஜிடம் வேண்டுகோள் விடுத்தார்.
அமைச்சர் றிஷாத் பதியுதீன் கடந்த சனிக்கிழமை இந்திய வெளிவிவகார அமைச்சர் சுஸ்மாவை கொழும்பு தாஜ் சமுத்திரா ஹோட்டலில் சந்தித்து இலங்கை முஸ்லிம்களின் பிரச்சினைகள் அபிலாசைகள் குறித்து கலந்துரையாடினார்.
பின்பு அவர், நடைபெற்ற பேச்சுவார்த்தை குறித்து ஊடகங்களுக்கு கருத்து தெரிவிக்கையிலேயே மேற்கண்டவாறு கூறினார்.
தொடர்ந்தும் அவர் கலந்து ரையாடல் குறித்து விபரிக்கையில்;
வடக்கு கிழக்கில் கடந்த காலங்களில் நிலவி வந்த தமிழ், முஸ்லிம் நல்லுறவும் சகோதர மனப்பான்மையும் ஆயுதப் போராட்டம் ஆரம்பிக்கப்பட்டதன் பின்பு விரிசலடையத் தொடங்கி பல பிரச்சினைகள் இரு இனங்களுக்கும் இடையில் ஏற்பட்டன.
யுத்தம் முடிவுக்குக் கொண்டு வரப்பட்டு சமாதானம் உருவானதன் பின்பு மேற்கொள்ளப்படவுள்ள இனப் பிரச்சினைக்கான தீர்வு தமிழ், முஸ்லிம் சமூகங்கள் மீண்டும் நல்லுறவுடன் இணைந்து வாழ்வதற்கான சூழலை உருவாக்க வேண்டும்.
வடக்கு கிழக்கில் வாழும் தமிழர்களும் முஸ்லிம்களும் முரண்படாத வகையிலும் எந்தவொரு இனத்தையும் பாதிக்காத வகையிலும் உருவாகும் தீர்வையே அகில இலங்கை மக்கள் காங்கிரஸ் ஆதரிக்கும் என்பதை உறுதியாக இந்திய வெளிவிவகார அமைச்சரிடம் தெரிவித்தேன்.
இனப்பிரச்சினைக்கு காத்திரமான தீர்வொன்று வழங்கப்படுவதற்கு முன்னர் தமிழ்த் தேசிய கூட்டமைப்பு அடங்கலாக ஏனைய தமிழ்க் கட்சிகளும் முஸ்லிம் சமூகத்தைப் பிரதிநிதித்துவப்படுத்தும் கட்சிகளும் தமக்குள் பரஸ்பரம் கலந்து பேசி ஒரு பொதுவான உடன்பாட்டை எட்டிய பின்னரே இறுதித் தீர்வுக்கான பேச்சுவார்த்தைகளை முன்னெடுப்பது பொருத்தமாகும்.
அரசியலமைப்பு சீர்திருத்தம், தேர்தல் முறையில் மாற்றங்கள், இனப்பிரச்சினைக்கான நிரந்தரத் தீர்வு போன்ற விடயங்களை முன்னெடுக்கும்போது பெரும்பான்மை இனத்தை திருப்திப்படுத்தக் கூடிய வகையில் மட்டும் அவை அமையாது சிறுபான்மைச் சமூகத்தின் நலன்களைப் பேணும் வகையிலும் அந்த முன்னெடுப்புகள் இருக்க வேண்டுமெனவும் அதுவே நடைமுறைச் சாத்தியமாக அமையுமெனவும் எடுத்து விளக்கினேன்.
கடந்த காலங்களில் இலங்கையின் அபிவிருத்தி, மீள் குடியேற்றம் மற்றும் வீடமைப்புத் திட்டங்களில் இந்தியா ஆற்றிய அளப்பரிய பங்களிப்புகளுக்கு நன்றிகளைத் தெரிவித்த அமைச்சர் ரிசாத் பதியுதீன் யுத்தத்தினால் பாதிக்கப்பட்ட வடக்கு– கிழக்கு மக்களின் நல்வாழ்வுத் திட்டங்களுக்கு இந்தியா தொடர்ந்தும் உதவுமென தான் எதிர்பார்ப்பதாகவும் குறிப்பிட்டார்