ad34@hFacMC 
நாட்டில் அமுலிலுள்ள வக்பு சட்டத்தில் சில திருத்தங்கள் மேற்கொள்ளப்படவுள்ளன.
முஸ்லிம் சமய விவகார அமைச்சும் முஸ்லிம் சமய கலாசார பண்பாட்டலுவல்கள் திணைக்களமும் வக்பு சபையும் வக்பு ட்ரிபியுனலும் வக்பு சட்டத்தில் திருத்தங்களைச் செய்வதற்கு இணங்கியுள்ளன.
இச்சட்டத்தில் திருத்தங்களைச் செய்வதற்கு முஸ்லிம் சமய விவகார மற்றும் தபால் அமைச்சர் எம்.எச். ஏ. ஹலீன் சட்டத்தரணிகள் அடங்கிய குழுவொன்றினை நியமித்துள்ளார்.
வக்பு சட்டத்தின் கீழேயே வக்பு ட்ரிபியுனல் (வக்பு நீதிமன்றம் ) இயங்கி வருகிறது. வக்பு சட்டத்தின் கீழ் பள்ளிவாசல்கள் தரீக்காக்கள் இவற்றின் ஆதனங்கள் சொத்துக்கள் என்பன அடங்குகின்றன.
இவற்றில் ஏற்படும் பிணக்குகள் மற்றும் ஊழல்களை வக்பு ட்ரிபியுனலே விசாரித்து தீர்ப்பு வழங்குகின்றது.
இன்றைய கால கட்டத்தில் சூழ்நிலைக்கேற்ப சில திருத்தங்களைச் செய்ய வேண்டுமென வக்பு சபை அமைச்சர் ஹலீனா கேட்டுக்கொண்டதற்கிணங்கவே அமைச்சரால் இந்தக் குழு நியமிக்கப்பட்டுள்ளது. கடந்த 1980 ஆம் ஆண்டுக்குப் பின்பு வக்பு சட்டத்தில் திருத்தங்கள் மேற்கொள்ளப்படவில்லை என்பது குறிப்பிடத்தக்கதாகும்.
அமைச்சரினால் நியமிக்கப்பட்டுள்ள குழு மேற்கொள்ளப்பட வேண்டிய திருத்தங்கள் பற்றி ஆராய்ந்து அறிக்கை சமர்ப்பித்ததும் அவை பாராளுமன்றத்தில் சமர்ப்பிக்கப்பட்டு நிறைவேற்றப்படும் வக்பு சபையும் வக்பு ட்ரிபியுனலும் தமது பணிகளைத் துரிதமாக முன்னெடுப்பதற்கு இத்திருத்தங்கள் அவசியம் என்பது அமைச்சரிடம் சுட்டிக்காட்டப்பட்டுள்ளது.