இலங்கையின் முன்னாள் ஆட்சியாளர் களின் உறவினர்களின் பெயர்களில் வெளிநாடுகளின் வங்கிகளில் பல பில்லியன் ரூபா கணக்குகள் உள்ளன. அவற்றை முடக்கி
அந்த பணத்தை இலங்கைக்கு கொண்டுவர நடவடிக்கை எடுக்கப்படும் என்று அமைச்சரவையின் பேச்சாளரும் அமைச்சருமான ராஜித சேனாரட்ன தெரிவித்தார்.
இந்த வங்கிக் கணக்குகள் தொடர்பில் தற்போது விசாரணை நடத்தப்படு கின்றது. அதன் முடிவில் திடுக்கிடும் தகவல்கள் வெளிவரலாம் என்றும் அவர் கூறினார்.
எவன்கார்ட் நிறுவனம் தொடர்பில் விரைவான சட்ட நடவடிக்கைகளை எடுப்பதற்கு ஜனாதிபதி உத்தரவிட்டுள் ளார். அதன்படி விசாரணைகள் துரித கதியில் முன்னெடுக்கப்படும் என்றும் அமைச்சர் குறிப்பிட்டார்.
அரசாங்க தகவல் திணைக்களத்தில் நேற்று நடைபெற்ற வாராந்த அமைச்சரவை முடிவுகளை அறிவிக்கும் செய்தியாளர் மாநாட்டில் கலந்துகொண்டு உரையாற்றுகையிலேயே அவர் மேற்கண்டவாறு குறிப்பிட்டார்.
அமைச்சர் அங்கு மேலும் குறிப்பிடுகையில் இலங்கையின் முன்னைய ஆட்சியாளர்களின் பல பில்லியன் ரூபா கணக்குகள் வெளிநாட்டு வங்கிகளில் உள்ளன. அவற்றை முடக்கி பணத்தை மீண்டும் இலங்கைக்கு கொண்டுவர நடவடிக்கை எடுக்கப்பட்டுள்ளது.
கேள்வி:உங்கள் குற்றச்சாட்டை நாமல் ராஜபக் ஷ எம்.பி. மறுத்திருந்தாரே?
பதில்: நான் அவரின் பெயரை குறிப்பிடவில்லையே? முன்னாள் ஆட்சியாளர்களின் மகன் ஒருவர் என்றுதானே கூறியிருந்தேன். யாருடைய பெயரையும் கூறவில்லை. தற்போது விசாரணைகள் இடம்பெற்றுவருகின்றன. விசாரணைகள் முடிவடைந்ததும் யாரின் பெயரில் கணக்குகள் உள்ளன என்று பார்ப்போம். டுபாயில் ஒரு வங்கியில் 1.086 பில்லியன் மற்றும் 1.8 பில்லியன் டொலர்கள் வைப்பு செய்யப்பட்டுள்ளன. டொலர்களை எங்கு வைப்புச் செய்தாலும் அது தொடர்பான பதிவுகள் அமெரிக்க பெடரல் வங்கிக்கு செல்லும். எனவே எம்மால் தகவல்களை பெற முடியும். ஆனால் காலம் எடுக்கும்.
இதேவேளை, எவன்கார்ட் நிறுவனம் தொடர்பில் விரைவான சட்ட நடவடிக்களை எடுப்பதற்கு ஜனாதிபதி உத்தரவிட்டுள்ளார். அதன்படி விசாரணைகள் துரிதகதியில் முன்னெடுக்கப்படும். இந்த விசாரணைகள் துரிதப்படுத்தப்பட்டுள்ளன. ஜனாதிபதியின் கீழ் இந்த பிரிவுகள் வருகின்றமையின் காரணமாக அவர் இது தொடர்பில் உத்தரவுகளை பிறப்பித்துள்ளார். உணமையில் சொல்லப்போனால் ஜனாதிபதி இந்த விடயங்களை தனது கையில் எடுத்துள்ளார் என்று கூற முடியும்.
கேள்வி:புதிய அரசியலமைப்பு தொடர்பில் ஏதாவது அமைச்சரவையில் பேசப்பட்டதா?
பதில்:அது தொடர்பில் எந்த விடயமும் பேசப்படவில்லை.