ad34@hFacMC 
‘ஹஜ்’ கோட்டா பகிர்வில் ஊழல்கள் இடம்பெற்றுள்ளதாகக் கூறி தொடர்ந்து நீதிமன்றத்தை நாடுவது சமூகத்துக்கு அவப் பெயரையே ஏற்படுத்தும். இதைத்தடுப்பதற்கு ஒரே வழி ஹஜ் ஏற்பாடுகளை அரசாங்கம் பொறுப்பேற்பதாகும் என அனர்த்த முகாமைத்துவ அமைச்சரும் முன்னாள் ஹஜ் குழுவின் இணைத்தலைவருமான ஏ.எச்.எம் பௌசி தெரிவித்தார்.
இவ்வருடத்துக்கான ஹஜ் கோட்டா பகிர்வில் அநீதியிழைக்கப்பட்டுள்ளதாகவும் நீதிமன்றம் ஆலோசனை வழங்கியிருந்த பொறிமுறைக்கேற்ப கோட்ட பகிரப்படவில்லை எனத்தெரிவித்து அதற்கு இடைக்கால தடையுத்தரவு விதிக்கக் கோரி மூன்று முகவர் நிலைய உரிமையாளர்கள் உயர்நீதிமன்றத்தில் வழக்கொன்று தாக்கல் செய்யதுள்ளமை தொடர்பில் வினவியபோதே அமைச்சர் பௌசி இவ்வாறு கூறினார்.
அவர் தொடர்ந்தும் கருத்து தெரிவிக்கையில் அமைச்சர் ஹலீம் பொறுப்புடன் இவ்வருட ஹஜ் ஏற்பாடுகளை மேற்கொண்டுள்ளார். இம்முறை ஹஜ்முகவர்களுக்கு எழுத்துப் பரீட்சையும் நடாத்தப்பட்டுள்ளது.அதன்படி புள்ளிகள் வழங்கப்பட்டுள்ளன.
ஹஜ் ஏற்பாடுகளில் ஏதும் தவறுகள் இடம்பெற்றிருந்தால் கலந்து பேசி தீர்வுகள் பெற்றுக்கொள்ள வேண்டும். முகவர்கள் தமது சுயநலத்தையும் இலாபத்தையுமே பற்றிச் சிந்திக்கிறார்கள்.
ஹஜ் முகவர்கள் ஹஜ்குழு எவ்வளவு நியாயமாக நடந்து கொண்டாலும் ஏற்றுக்கொள்ள மாட்டார்கள் அவர்களுக்கு அதிகமாக கோட்டா வழங்கப்பட்டால் நல்லது என்பார்கள் இல்லாவிட்டால் நீதிமன்றத்தை நாடுவார்கள்.
ஹஜ் விவகாரம் எமது சமூகத்தின் பிரச்சினையாகும் மாற்று இனத்தவர்கள் ஹஜ் பெரிய வியாபாரம் எனவும் இதன்மூலம் அதிகம் உழைக்கலாம் எனவும் சிந்திக்கத் தொடங்கி விட்டார்கள்.
சவூதி அரசாங்கம் உலகுக்கு வழங்கப்பட்டுவரும் ஹஜ்கோட்டாக்களின் எண்ணிக்கையை குறைப்பது தொடர்பாக ஆராய்ந்து வருகின்றது.யெமன் நாட்டில் நிலவும் யுத்த சூழ்நிலையே இதற்குக் காரணமாகும் அவ்வாறு கோட்டா எண்ணிக்கை குறைக்கப்பட்டால் ஹஜ் முகவர்களுக்கு தற்போது வழங்கப்பட்டுள்ள எண்ணிக்கை அரைவாசியாக குறையும்.
அந்நிலமை ஏற்பட்டால் தற்போது கோட்டா அதிகரித்துக்கேட்கும் முகவர்கள் என்ன செய்யப்போகிறார்கள்!
இந்நிலையில் ஹஜ் ஏற்பாடுகளை அரசாங்கமே பொறுப்பேற்று செய்வதே சிறந்த மாற்று வழியாகும்.
கஃபாவின் புனரமைப்பு வேலைகள் தற்போது நடந்து கொண்டிருக்கின்றன. அப்பிரதேசம் விரிவுபடுத்தப்படுகிறது. ஒரே நேரத்தில் ஒரு இலட்சத்து 50 ஆயிரம் பேர் ஒன்று கூடும் அளவுக்கு பாரிய வேலைத்திட்டம் இதுவாகும்.
இந்த திட்டம் பூர்த்தியானதும் நிச்சயம் சவூதி அரச அனைத்து நாடுகளினதும் கோட்டக்களை அதிகரிக்கும். அந்தச்சந்தர்ப்பத்தில் இலங்கை அரசாங்கம் மீண்டும் ஹஜ் ஏற்பாடுகளில் ஒரு பங்கினை முகவர்களுக்கு வழங்கலாம். அமைச்சர் ஹலீம் இது தொடர்பாக கலந்துரையாடல்களை நடாத்தி ஒரு தீர்மானத்துக்கு வருவது சிறந்தது எனக்கருதுகிறேன் என்றார்.
-Vidivelli-