2.2 அடி நீளமான பாரிய முத்து ஒன்றை பிலிப்பைன்ஸைச் சேர்ந்த மீனவர் ஒருவர் வைத்திருக்கிறார். இது, உலகில் இதுவரை கண்டுபிடிக்கப்பட்ட மிகப் பெரிய முத்து எனக் கருதப்படுகிறது.
பிலிப்பைன்ஸின் பலவான் தீவின் கடற்கரையொன்றில் 10 வருடங்களுக்கு முன்னர் மேற்படி மீனவர் இந்த முத்தை கண்டெடுத்தார். இதன் பெறுமதி சுமார் 10 கோடி அமெரிக்க டொலர்கள் (சுமார் 1,546 ரூபா) எனக் கருதப்படுகிறது. எனினும், மேற்படி மீனவர் இந்த முத்தின் பெறுமதியை உணரவில்லை. இம் முத்தை தனது அதிஷ்டப் பொருளாகக் கருதி தனது கட்டிலுக்கு கீழ் இதை வைத்திருந்தார்
அவரின் பலகையினாலான வீடு இவ் வருட முற்பகுதியில் தீக்கிரையான பின்னர் அவர் வேறிடம் செல்ல வேண்டி ஏற்பட்டது. அப்போது பலவான் தீவின் புவர்ட்டோ பிரின்செஸ்கா நகரிலுள்ள சுற்றுலாத்துறை அதிகாரி ஒருவரிடம் அவர் இந்த முத்தை காண்பித்தார்.
அதையடுத்தே இந்த பாரிய முத்து தொடர்பான விபரங்கள் தெரியவந்தன.
2.2 அடி நீளத்தையும் 1 அடி அகலத்தையும் கொண்ட இந்த முத்தின் எடை 34 கிலோகிராம் என்பது குறிப்பிடத்தக்கது.
இதற்குமுன் கண்டுபிடிக்கப்பட்டிருந்த உலகின் மிகப் பெரிய முத்தைவிட 5 மடங்கு பெரிதானதாகும்.
பிலிப்பைன்ஸ் சுற்றுலாத்துறை அதிகாரி அய்லீன் சிந்தியா அமுரோ இது தொடர்பாக கூறுகையில், “அவர் இந்த முத்தை எம்மிடம் கொண்டுவந்த போது நாம் பெரும் வியப்படைந்தோம்.
இந்த முத்தை சர்வதேச ஆபரண நிபுணர்கள் உறுதிப்படுத்துவதற்காக காத்திருக்கிறோம். இந்த முத்தை பிலிப்பைன்ஸிலேயே வைத்துக்கொள்ள வேண் டும் என நாம் விரும்புகிறோம்.
இதன்மூலம் இங்கு வரும் உல்லாசப் பயணிகளின் எண்ணிக்கை அதிகரிக்கும் என நாம் கருதுகிறோம்” என எனத் தெரிவித்துள்ளனர். இதற்குமுன் உலகின் மிகப்பெரிய முத்தாக கருதப்பட்டது “பேர்ள் ஒவ் அல்லாஹ்” என அழைக்கப்படும் முத்தாகும்.
இதுவும் பலவான் தீவில் 1934 ஆண்டு கண்டுபிடிக்கப்பட்டதாகும். 6.4 கிலோ கிராம் எடையுடைய இம்முத்தின் பெறுமதி 3.5 கோடி டொலர் (சுமார் 509 கோடி ரூபா) என மதிப்பிடப்பட்டுள்ளது. தற்போது இம் முத்து நியூயோர்க்கில் உள்ளது.