ad34@hFacMC 
நகரங்கள், கிராமங்கள் தோறும் 25 இலட்சம் வீடுகள் நிர்மாணிக்கும் பொறுப்பினை தன்னிடம் முன்னெடுக்குமாறு பிரதமரும் ஜனாதிபதியும் பணித்துள்ளதாக தெரிவித்துள்ள வீடமைப்பு நிர்மாணத்துறை அமைச்சர் சஜித் பிரேமதாஸ வீட்டுப் பிரச்சினைகளை கண்டறிய ஒவ்வொரு பிரதேச மாவட்ட மட்டத்தில் நடமாடும் சேவை ஆரம்பிக்கப்படவுள்ளதாகவும் குறிப்பிட்டார்.
அமைச்சர் சஜித் பிரேமதாஸ மேலும் தெரிவிக்கையில்,
இலங்கையில் நாளொன்றுக்கு சுமார் 15 முதல் 20 இலட்சம் குடும்பங்கள் நிரந்தர வீடுகள் இல்லாது பல்வேறு துன்பங்களுக்கு முகங்கொடுக்கின்றன. இந்தப் பாரிய பிரச்சினையை தீர்ப்பதற்கான மிகப்பெரும் பொறுப்பை ஜனாதிபதியும் பிரதமரும் என்னிடம் ஒப்படைத்துள்ளனர்.
எனது தந்தை மறைந்த ஜனாதிபதி ஆர்.பிரேமதாஸ இந்த நாட்டில் 10 இலட்சம் வீடுகள், 15 இலட்சம் வீடுகள் அமைப்பதற்கான திட்டங்களை நாடு முழுவதும் முன்னெடுத்திருந்தார். குறிப்பாக கிராமோதயம், செவன வீடமைப்புத் திட்டம், கம் உதாவ போன்ற வீடமைப்புக் கிராமங்களை உருவாக்கினார். அத்துடன் 2000 ஆம் ஆண்டளவில் யாவருக்கும் புகலிடம் என்ற இலக்கை நோக்கிச் சென்றார்.
ஆனால் அவர் மறைந்த பின்னர் அந்த இலக்கை அதன் பின் வந்த வீடமைப்பு அமைச்சர்களால் முன்னெடுக்க முடியவில்லை. தற்பொழுது நகரங்கள், கிராமங்கள் தோறும் 25 இலட்சம் வீடுகள் நிர்மாணிக்கும் பொறுப்பினை என்னிடம் முன்னெடுக்குமாறு பிரதமரும் ஜனாதிபதியும் பணித்துள்ளனர்.
100 நாள் வேலைத்திட்டத்தில் நான் வீடமைப்பு அமைச்சினை பாரமெடுத்து கடந்த 6 மாதகாலத்திற்குள் 35ஆயிரம் வீடுகள் நிர்மாணிக்கப்பட்டுள்ளன. அடுத்த டிசம்பர் மாதத்திற்குள் அவ்வீடுகளின் நிர்மாணப்பணிகள் முழுமைப்படுத்தப்பட்டு மக்களிடம் கையளிக்கப்படும். செவன என்ற திட்டத்தின் கீழ் மறைந்த ஜனாதிபதியின் வீடமைப்புத்திட்டங்கள் என்னால் முன்னெடுக்கப்படவுள்ளன. எனது அமைச்சின் அதிகாரிகள் என்னோடு ஒத்துழைத்து மக்களது வீட்டுப்பிரச்சினையை தீர்ப்பதற்கு உதவ வேண்டும்.
இந்த அமைச்சில் அரச சொத்துக்கள் துஸ்பிரயோகம், மக்களை அலைக்களித்தல் போன்ற செயல்களுக்கு ஒருபோதும் இடம் அளிக்கப்பட மாட்டாது. கடந்த 100 நாள் அரசில் அமைச்சர் ரிஷாத் பதியுதீனின் கட்சியினைச் சேர்ந்த அமீர் அலி பிரதியமைச்சராக என்னுடன் இணைந்திருந்தார். அவருடன் இணைந்து அமைச்சின் வேலைத்திட்டங்களை எவ்வித தடங்கலுமின்றி முன்னெடுத்தேன்.
தற்போது ஸ்ரீல.சு.கட்சியின் இந்திக்க பண்டார பிரதியமைச்சராக நியமிக்கப்பட்டுள்ளார். இந்த தேசிய அரசியல், கட்சி, நிறம், மதம், இனம், பாகுபாடின்றி சகல இன மக்களுக்குமான சேவைகள் முறையாக முன்னெடுக்கப்படவுள்ளன. வீட்டுப் பிரச்சினைகளை கண்டறிய ஒவ்வொரு பிரதேச மாவட்ட மட்டத்தில் நடமாடும் சேவை ஆரம்பிக்கப்படவுள்ளது. அத்துடன் ஒக்டோபர் 5 ஆம் திகதி நடைபெறவுள்ள உலக குடியிருப்பு தினத்தினை முன்னிலைப்படுத்தி பல்வேறு வீடமைப்பு வேலைத்திட்டங்கள் நாடுமுழுவதும் நடை முறைப்படுத்தப்படவுள்ளது என்றார்.