ad34@hFacMC 
ஐக்கிய நாடுகள் மனித உரிமைகள் சபையின் விசாரணை அறிக்கையில் பாரதூரமான விடயங்கள் சுட்டிக்காட்டப்பட்டாலும் பரிந்துரைகள் பாரதூரமாக அமையாது.
பாரதூரமான அத்துமீறல் விசாரணைகள் வலியுறுத்தப்படமாட்டாது என்ற நம்பிக்கை எமக்கு உள்ளது என பிரதிவெளிவிவகார அமைச்சர் ஹர்ஷ டி சில்வா தெரிவித்தார்.
இலங்கையில் இடம்பெற்றதாக கூறப்படும் மனித உரிமை மீறல்கள் தொடர்பில் உண்மைகளை கண்டறிய உள்ளக விசாரணைகளை பலப்படுத்தி அதனூடாக சந்தேகங்களை தீர்க்க அரசாங்கம் செயற்படும் எனவும் அவர் குறிப்பிட்டார்.
இலங்கை மீதான விசாரணை அறிக்கை பாரதூரமான வகையில் அமையும் என தெரிவிக்கப்பட்டுள்ள நிலையில் இலங்கை அரசாங்கம் எவ்வாறான பொறிமுறைகளை கையாளப்போகின்றது என வினவிய போதே அவர் மேற்கண்டவாறு குறிப்பிட்டார்.
அவர் மேலும் கூறுகையில்,
இலங்கையில் நடைபெற்ற ஆயுத போராட்டத்தில் இலங்கை இராணுவத்தினால் மேற்கொள்ளப்பட்டதாக கூறப்படும் போர்க்குற்றங்கள் மற்றும் மனிதவுரிமை மீறல்கள் என்பன தொடர்பில் சர்வதேச அமைப்புகளும், இலங்கையின் தமிழர் தரப்பும் குற்றச்சாட்டுகளை முன்வைத்துள்ளன. இவை தொடர்பில் ஐக்கிய நாடுகள் மனித உரிமைகள் ஆணைக்குழு விசாரணைகளை மேற்கொண்டிருந்த நிலையில் இந்த விசாரணை அறிக்கை இப்போது வெளிவரவுள்ளது. இந்த அறிக்கை பாரதூரமான அறிக்கையாக இலங்கையின் அரச தரப்பின் மீது குற்றம் சுமத்தப்படும் என தெரிவிக்கப்பட்டாலும் அவை எந்தளவு சாத்தியமானது என்பது தெரியவில்லை.
ஏனெனில் இந்த அறிக்கையில் என்ன காரணிகள் முன்வைக்கப்போகின்றனர். எவ்வாறான காரணிகள் சுட்டிக்காட்டப்படும் என்ற விடயங்கள் எமக்குத் தெரியாது. ஆனால், இலங்கையின் ஆட்சி மாற்றம் இலங்கையின் ஜனநாயக செயற்பாடுகளை பலமடைய செய்துள்ளதுடன் பிரச்சினைகள் பல தீர்க்கப் பட்டுள்ளன.
ஆகவே, எமது அரசாங்கத்தின் செயற்பாடுகள் தொடர்பில் சர்வதேசம் நல்ல நிலைப்பாட்டை கொண்டுள்ளது. ஜெனிவா கூட்டத்தொடரின் ஆரம்ப உரையின் போதும் மனித உரிமைகள் ஆணையாளர் இந்த விடயங்களை சுட்டிக்காட்டியிருந்தார்.
அதேபோல், வெளிவிவகார அமைச்சர் மங்கள சமரவீரவும் இலங்கையின் அண்மைக்கால ஜனநாயக மாற்றங்கள் மற்றும் மக்களிடையேயான சாதகமான வெளிப்பாடுகள் தொடர்பில் வெளிப்படுத்தியுள்ளார். அவ்வாறான நிலையில் இலங்கையின் அண்மைக்கால மாற்றங்களை கவனத்தில் கொண்டு சாதகமான முடிவுகளை ஐக்கிய நாடுகள் சபை மேற்கொள்ளும் என நம்ப முடியும். அத்தோடு அறிக்கையில் பாரதூரமான விடயங்கள் சுட்டிக்காட்டப்பட்டாலும் பரிந்துரைகள் பாரதூரமாக அமையாது. அதேபோல் உள்ளக பொறிமுறைகளை கையாளும் அழுத்தங்கள் கொடுக்கப்படலாம்.
ஆனால், பாரதூரமான அத்துமீறல் விசாரணைகள் வலியுறுத்தப்பட மாட்டாது என்ற நம்பிக்கை எமக்கு உள்ளது.
மேலும் இலங்கையில் இடம்பெற்றதாக கூறப்படும் மனித உரிமை மீறல்கள் தொடர்பில் உண்மைகளை கண்டறிய அரசாங்கம் அனைத்து முயற்சிகளையும் மேற்கொண்டு வருகின்றது. உள்ளக விசாரணைகளை பலப்படுத்தி அதனூடாக சந்தேகங்களை தீர்க்கவே நாம் முயற்சிக்கின்றோம். அதேபோல் தமிழ் மக்களின் நிலைப்பாடுகளை நாம் நன்கு அறிந்துள்ளோம். அவர்கள் எவ்வாறான நீதியை எதிர்பார்க்கின்றனர் என்பது எமக்குத் தெரியும். ஆகவே அனைத்து வகையிலும் இந்த சிக்கல் நிலைமையை தீர்க்கும் முயற்சிகளை அரசாங்கம் முன்னெடுத்து வருகின்றது.
அதேபோல் இலங்கை இராணுவத்தின் சேவைகளை நாம் கருத்தில் கொள்ள வேண்டும். அவர்களின் மூலமாகவே இந்த நாட்டில் அமைதி உருவாகியுள்ளது. அவர்களின் சேவையினை நாம் தட்டிக்கழிக்க முடியாது. ஆயினும் பொதுமக்களை பாதிக்கும் வகையில் அல்லது மனிதவுரிமை மீறல்களை இராணுவம் மேற்கொண்டிருக் குமாயின் அதனை அரசாங்கம் கவனத்தில் கொள்ளும் என்றார்.