கடத்தப்பட்டு காணாமல் போன ஊடகவியலாளர் பிரகீத் எக்னெலிகொட, கிரித்தலை இராணுவ முகாமில் தடுத்து வைக்கப்பட்டு, அங்கிருந்து வெலிக்கந்த முகாமுக்கு கொண்டு செல்லப்பட்டுள்ளதாக இதுவரை மேற்கொள்ளப்பட்ட விசாரணைகளில் தெரியவந்துள்ளது. அதன் பின்னர் வெலிக்கந்த முகாமில் அவருக்கு என்ன நடந்தது என்பது குறித்து தற்போது விசாரணைகளில் அவதானம் செலுத்தப்பட்டுள்ளதாகவும் விரைவில் வெலிக்கந்த முகாமை சோதனைக்கு உட்படுத்த மன்றின் அனுமதியை சட்ட மா அதிபரின் ஆலோசனையுடன் பெற்றுக்கொள்ள உள்ளதாகவும் பொலிஸ் தகவல்கள் தெரிவிக்கின்றன.
ஹோமாகம நீதிவான் நீதிமன்றில் பெற்றுக்கொள்ளப்பட்ட சோதனை அனுமதியின் பிரகாரம், எக்னெலிகொட விவகாரத்தில் தற்போது கைதாகியுள்ள 11 பேரில் 7 பேர் புலனாய்வுப் பிரிவின் சமூக கொள்ளை தொடர்பிலான விசாரணைப் பிரிவின் உதவி பொலிஸ் அத்தியட்சர் சானி அபேசேகர, பொலிஸ் பரிசோதகர் நிஸாந்த டீ சில்வா ஆகியோர் உள்ளடங்கிய குழுவினரால் கடந்த செவ்வாயன்று கிரித்தலை முகாமுக்கு கொண்டு செல்லப்பட்டு விசாரணைக்கு உட்படுத்தப்பட்டனர். அன்றைய தினம் மாலை 6 மணி வரை இவ்விசாரணைகள் இடம்பெற்றிருந்ததுடன், கிரித்தலை இராணுவ புலனாய்வு முகாமில் பிரதான வாயிலில் பேணப்பட்ட அதிகாரிகள் விடுமுறையில் செல்லும்போதும் மீண்டும் வரும்போதும் பதியப்படும் ஆவணம், அந்த முகாமில் 20 கிலோ மீட்டருக்கு அப்பால் செல்ல வழங்கப்படும் அனுமதி ஆவணம் ஆகியவையும் சோதனைக்கு உட்படுத்தப்பட்டன. இதிலிருந்து பல்வேறு தகவல்கள் பெறப்பட்டுள்ளதுடன் மேலதிக விசாரணைகளில் எக்னெலிகொட கிரித்தலையில் இருந்து, அப்போது அம்முகாமுக்கு பொறுப்பாக இருந்த கேர்ணல் தர அதிகாரியினால் வெலிக் கந்த முகாமுக்கு கொண்டு செல்லப்பட்டுள்ளமை தெரியவந்துள்ளது.
இதற்கு மேலதிகமாக, எக்னெலிகொடவுக்கு சொந்தமான சிகிரியவில் உள்ள இடமொன்றில் 2009 ஆம் ஆண்டு ஆகஸ்ட் மாதம் 27 ஆம் திகதி செய்யப்பட்டதாக கூறப்படும் கலந்துரையாடல் ஒன்றினை இராணுவ புலனாய்வாளர்கள் ஒலிப்பதிவு செய்துள்ளனர். அந்த ஒலிப்பதிவானது மறுநாள் புலனாய்வு பணிப்பாளருக்கு அனுப்பி வைக்கப்பட்டுள்ளது. புலனாய்வு பணிப்பாளருக்கு அனுப்பப்பட்டுள்ள ஆவணம், புலனாய்வாளர்கள் தொலைபேசி இலக்கங்கள் மற்றும் அதனுடன் தொடர்புபட்ட ஆவணங்களை நேற்று முன் தினம் குற்றப் புலனாய்வுப் பிரிவினர் ஆய்வு செய்துள்ளனர்.
இதனைவிட கொழும்பில் உள்ள ஏனைய நான்கு சந்தேக நபர்களையும் எதிர்வரும் 13 ஆம் திகதிக்குள் கிரித்தலை முகாமுக்கு அழைத்துச் சென்று மேலதிக விசாரணைகளை முன்னெடுக்கவும் புலனாய்வுப் பிரிவினர் தீர்மானித்துள்ளனர். இதுவரை முன்னெடுக்கப்பட்ட விசாரணைகளில் கடத்தப்பட்ட எக்னெலிகொட, இராணுவ புலனாய்வாளர்களால் கொலை செய்யப்பட்டிருக்கலாம் என சந்தேகம் அதிகரித்துள்ளது.
ஊடகவியலாளர் பிரகீத் எக்னெலிகொட காணாமல் போனமை தொடர்பில் அவரது மனைவி சந்தியா எக்னெலிகொட குற்றப் புலனாய்வுப் பிரிவில் முறையிட்டதை தொடர்ந்து அது தொடர்பிலான விசாரணைகள் ஆரம்பிக்கப்பட்டிருந்தன. பொலிஸ் மா அதிபர் என். கே. இலங்ககோனின் உத்தரவுக்கமைய குற்றப் புலனாய்வுப் பிரிவுக்கு பொறுப்பான சிரேஷ்ட பொலிஸ் மா அதிபர் ரவி செனவிரத்ன, அப்பிரிவின் பணிப்பாளர் சுகத் நாகஹமுல்ல ஆகியோரின் நேரடி மேற்பார்வையில் இந்த விசாரணைகள் புலனாய்வுப் பிரிவின் சமூக கொள்ளை தொடர்பிலான விசாரணைப் பிரிவுக்கு பொறுப்பான உதவிப் பொலிஸ் அத்தியட்சர் சானி அபேசேகரவின் கீழ் அந்த பிரிவின் பொறுப்பதிகாரி பொலிஸ் பரிசோதகர் நிசாந்த டி சில்வா தலைமையிலான பொலிஸ் குழுவினரால் முன்னெடுக்கப்பட்டுள்ளமை குறிப்பிடத்தக்கது.