தமிழ்த் தேசியக் கூட்டமைப்பின் உப தலைவரும் முன்னாள் மட்டக்களப்பு மாவட்ட பாராளுமன்ற உறுப்பினருமான ஜோசப் பரராஜசிங்கத்தை சுட்டு படுகொலை செய்தமை, தொடர்பில் பயங்கரவாத தடைச் சட்டத்தின் கீழ் கைது செய்யப்பட்ட கிழக்கு மாகாண முன்னாள் முதலமைச்சரும் தமிழ் மக்கள் விடுதலைப் புலிகள் கட்சியின் தலைவருமான சிவனேசதுரை சந்திரகாந்தன் (பிள்ளையான்) 90 நாள் தடுப்புக் காவல் விசாரணைகளுக்கு முகம் கொடுக்கும் சாத்தியம் உள்ளதாக பொலிஸ் தலைமையக தகவல்கள் தெரிவிக்கின்றன.
கடந்த ஞாயிறன்று கைது செய்யப்பட்ட அவரிடம் முன்னாள் எம்.பி. பரராஜசிங்கத்தின் கொலை தொடர்பில், புலனாய்வுப் பிரிவின் மனிதப் படுகொலைகள் தொடர்பிலான விசாரணைப் பிரிவுக்கு பொறுப்பான உதவி பொலிஸ் அத்தியட்சரின் கீழ் நேற்று மாலையாகும் போதும் விஷேட விசாரணைகள் இடம்பெற்றுக்கொண்டிருந்த நிலையில் பாதுகாப்பு அமைச்சிடம் 90 நாள் தடுப்புக் காவலுக்கான அனுமதியை கோருவதா இல்லையா என 72 மணி நேர விசாரணையை அடுத்து தீர்மானிக்கப்படும் என பொலிஸ் ஊடகப் பேச்சாளர் உதவி பொலிஸ் அத்தியட்சர் சட்டத்தரணி ருவன் குணசேகர தெரிவித்தார்.
கடந்த 2005 ஆம் ஆண்டு டிசம்பர் மாதம் 25 ஆம் திகதி நத்தார் சிறப்பு ஆராதனைகளின் போது மட்டக்களப்பு, தேவாலயம் ஒன்றில் வைத்து முன்னாள் எம்.பி. ஜோசப் பரராஜ சிங்கம் அடையாளம் தெரியாத ஆயுததாரிகளால் சுட்டுக்கொலை செய்யப்பட்டதுடன் அவரது மனைவி உள்ளிட்ட 8 பேர் சம்பவத்தில் காயங்களுக்கு உள்ளாகினர்.
இது தொடர்பில் பொலிஸ் மா அதிபர் என்.கே.இலங்ககோனின் உத்தரவுக்கு அமைய குற்றப் புலனாய்வுப் பிரிவுக்கு பொறுப்பான சிரேஷ்ட பிரதிப் பொலிஸ் மா அதிபர் ரவி செனவிரத்ன, அதன் பணிப்பாளர் சுதத் நாகஹமுல்ல ஆகியோரின் மேற்பார்வையில் புலனாய்வுப் பிரிவின் மனிதப் படுகொலைகள் தொடர்பிலான விசாரணைப் பிரிவு விஷேட விசாரணைகளை நடத்துகின்றது. தொடர்ந்தும் நான்காம் மாடியில் தடுத்து வைக்கப்பட்டு விசாரணைக்கு உட்படுத்தப்பட்டுள்ளார். இந் நிலையில் மிக நீண்ட விசாரணைகளுக்கு உட்படுத்தப்பட்டுள்ள பிள்ளையானிடம் நேற்று மாலையாகும் போதும் பல தகவல்களை புலனாய்வுப் பிரிவினர் வெளிப்படுத்திக்கொண்டுள்ளதாக பொலிஸ் தலைமையகத்தின் உயர் அதிகாரி ஒருவர் தெரிவித்தார்.
பயங்கரவாத தடைச் சட்டத்தின் கீழ் பிள்ளையான் கைது செய்யப்பட்டுள்ள நிலையில் நேற்று மாலை 6.15 ஆகும் போது கைதாகி 48மணி நேரமே நிறைவடைந்திருந்தது. அதன்படி பொலிஸாருக்கு பிள்ளையானை 72 மணி நேரம் தடுத்து வைத்து விசாரிக்க அனுமதியுள்ளது இன்று பெரும்பாலும் பாதுகாப்பு அமைச்சு ஊடாக 90 நாள் தடுப்புக் காவல் அனுமதி பெறப்படும் என எதிர்பார்க்கப்படுகின்றது.
பிள்ளையானிடம் நேற்று மாலை வரை வெளிப்படுத்திக்கொள்ளப்பட்ட தகவல்க ளுக்கு மேலதிகமாக மேலும் பல விஷேட தகவல்கள் வெளிப்படுத்திக்கொள்ள வேண்டி உள்ளதால், பெரும்பாலும் விசா ரணைக்கு 72 மணி நேரம் போதாமல் போக லாம் எனவும் அதனால் 90 நாள் தடுப்புக் காவல் உத்தரவு பெற்றுக்கொள்ளப்படலாம் எனவும் புலனாய்வுப் பிரிவின் உயர் அதிகாரி ஒருவர் சுட்டிக்காட்டினார்.