மத்திய கிழக்கு நாடுகளுக்கு தொழிலுக்கு செல்லும் பணிப்பெண்களின் பயிற்சிக் காலம் 40 நாட்கள் வரை நீடிக்கப்பட்டுள்ளதாக வெளிநாட்டு வேலைவாய்ப்பு பணியகம் அறிவித்துள்ளது.
வெளிநாட்டு வேலைவாய்ப்பு அமைச்சர் தலதா அத்துகோரள வெளிநாட்டுக்கு பணிப்பெண்களாக செல்லும் பெண்களுக்கு வழங்கப்படும் பயிற்சியின் ஆரோக்கியத்தன்மை மற்றும் அதன் கால அளவு தொடர்பாக ஆராய்ந்து இந்த தீர்மானத்தை எடுத்ததாக பணியகத்தின் ஊடகப்பேச்சாளர் உபுல் தேஷப்பிரிய தெரிவித்தார்.
இது தொடர்பாக அவர் மேலும் கூறுகையில்,
இதுவரை காலமும் மத்திய கிழக்கு நாடுகளுக்கு பணிப்பெண்களாக தொழிலுக்கு செல்பவர்களுக்காக 21 நாட்கள் வழங்கப்பட்ட பயிற்சிக்காலம் 40 நாட்கள் வரை அதிகரிக்கப்பட்டுள்ளது. மத்திய கிழக்கு நாடுகளுக்கு பணிப்பெண்களாக தொழிலுக்கு செல்பவர்கள் கட்டாயம் இந்த 40 நாட்கள் பயிற்சியை பெற்றிருக்க வேண்டும். அத்துடன் தேசிய தொழில் திறன் சான்றிதழும் வைத்திருக்க வேண்டும்.
மத்திய கிழக்கு நாடுகளுக்கு பணிப்பெண்களாக தொழிலுக்கு செல்லும் பெண்கள் தொடர்பாக பணியகத்துக்கு நீண்டகால அவதானம் இருப்பதுடன் மத்திய கிழக்கு நாடுகள் எதிர்பார்க்கும் வீட்டுப் பணிப்பெண் பயிற்சி உட்பட திறமை தொடர்பாக கூடுதலான அனுபவமும் இருக்கின்றது.
அதேபோன்று மத்திய கிழக்கு நாடுகளில் தொழிலுக்காக எதிர்பார்க்கும் எமது நாட்டுப் பெண்கள் ஆரோக்கியம் மற்றும் போதுமானளவு பயிற்சி பெற்றிருக்க வேண்டும். இதனால் அந்த நாடுகள் எதிர்பார்க்கும் தேவைகளை பூர்த்திசெய்வதற்கு முடியுமாக இருக்கின்றது.
இதற்கு முன்பு வழங்கப்பட்ட 21 நாட்கள் பயிற்சியின் மூலம் எதிர்பார்த்த இலக்கை நோக்கி நெருங்க முடியுமாக இருந்தது. அதனை மேலும் போதுமானளவு வரை பெற்றுக்கொள்வதற்கு தேவை ஏற்பட்டுள்ளது. அது மத்திய கிழக்கு பகுதிகளில் தொழிலாளர்களை பெற்றுக் கொள்ளும் நாடுகளின் எதிர்பார்ப்புமாகும். 21 நாட்கள் பயிற்சியின் போது தொழில் திறன், திறமையை அதிகரித்தல், தொடர்பாடல் இயலுமை, தொழில் புரியும் இடத்தில் ஏற்படும் சவால்களுக்கு முகம் கொடுத்தல் மற்றும் நிதி முகாமைத்துவம் உட்பட பல விடயங்களுக்கு இங்கு பயிற்சி வழங்கப்படுகின்றது. 40 நாட்கள் பயிற்சியின் போது இந்த விடயங்களை மேலும் ஆரோக்கியமாகவும் போதுமானளவு அதிகரித்தும் வழங்கப்படும். பயிற்சியின் இறுதியில் தேசிய தொழில் திறன் எனும் NVQ சான்றிதழ் வழங்கப்படும் என்றார்.