பாராளுமன்றத்தில் பொது எதிரணியாக சுயாதீன மாக செயற்படுவதற்கு அனுமதி வழங்க வேண்டுமென கோரிக்கை விடுத்த மஹிந்த அணியினரின் வேண்டுகோள் சபாநாயகரினால் நிராகரிக்கப்பட்டதையடுத்து மஹிந்த ஆதரவு அணி எம்.பிக்கள் சபை மத்தியில் வந்து கூச்சல் குழப்பத்தில் ஈடுபட்டனர்.
இக்கூச்சல் குழப்பத்திற்கு மத்தியில் பிரதமர் ரணில் விக்கிரமசிங்க சபையில் முன்வைத்த உள்ளூராட்சி சபைகள் தேர்தல் திருத்த சட்ட மூலம் நிறைவேற்றப்பட்டது.
52 எம்.பிக்கள் கையெழுத்திட்டு இணைந்த பொது எதிரணியாக பாராளுமன்றத்தில் சுயாதீனமாக செயற்படுவதற்கான கடிதம் சபாநாயகரிடம் கையளிக்கப்பட்ட போதும் அதற்கு இதுவரையில் பதில் கிடைக்கவில்லை. எனவே இதற்கு இன்றே பதில் வேண்டுமென மஹிந்த அணி ஆதரவு எம்.பிக்களான தினேஷ்குணவர்த்தன, விமல் வீரவன்ச, வாசுதேவ நாணயக்கார, பந்துல குணவர்தன ஆகியோர் சபையில் கருத்துக்களை வெளியிட்டனர்.
இது தொடர்பில் பிரதமர் ரணில் விக்கிரமசிங்கவும் தனது கருத்துக்களை வெளியிட்டார்.
பாராளுமன்றத்தில் ஒரு எதிர்க்கட்சி தான் இருக்க முடியும். அதற்கு மேலதிகமாக எதிர்க்கட்சி இருக்கமுடியாது என்று பிரதமர் தெரிவித்தார்.
இவ்வாறு மஹிந்த அணியினருக்கும் அரசு தரப்பினருக்கும் இடையே இது விடயம் தொடர்பில் காரசாரமான வாதப்பிரதிவாதங்கள் சபையில் இடம்பெற்றது. இதன் போது இரு தரப்பிலும் கூச்சல்கள் தலைதூக்கின.
இந்நிலையில் சபாநாயகர் தனது தீர்ப்பை வழங்கும் போது, ஐக்கிய மக்கள் சுதந்திர முன்னணியை அழிக்கும் பாவத்திற்கு என்னால் பங்காளியாக முடியாது எனத் தெரிவித்தார்.
இதன் போது மஹிந்த அணி ஆதரவு எம்.பி.க்கள் தினேஷ் குணவர்த்தன எம்.பி தலைமையில் சபா மண்டபத்தில் நடுவே வந்து கூச்சல் குழப்பத்தில் ஈடுபட்டனர்.
சரியாக பிற்பகல் 2.00 மணியளவில் இவ்வாறு சபை நடுவில் நின்று கொண்டு கூச்சல் இட்டனர். இணைந்த எதிர்க்கட்சியின் உரிமையை வழங்குமாறு அவர்கள் ஒன்றிணைந்து கூச்சலிட்டனர்.
இதன் போது உறுப்பினர்கள் செங்கோலை தூக்க முயற்சித்தபோதும் படைக்கல சேவிதர்கள் அதற்கு இடமளிக்கவில்லை.
இதன் போது பிரதமர் ரணில் விக்கிரமசிங்க உள்ளூராட்சி சபைகளின் தேர்தல் திருத்தச் சட்ட மூலம் தொடர்பில் தனது உரையை ஆரம்பித்தார்.
பிரதமருக்கு ஒலிவாங்கி முடுக்கிவிடப்பட்டிருந்தது. பிரதமர் தனது உரையை நிறுத்தாமல் தொடர்ந்தார்.
அதேவேளை எதிர்த்தரப்பு எம்.பி.க்களின் கூச்சல் குழப்பம் இடம்பெற்ற வண்ணம் இருந்தது. எம்.பிக்களான தினேஷ்குணவர்த்தன, வாசுதேவ நாணயக்கார, நாமல் ராஜபக் ஷ, ஹெகலிய ரம்புக்வெல உட்பட மஹிந்த சார்பு எம்.பி.க்கள் பலர் கூச்சல் குழப்பத்தில் ஈடுபட்டனர்.
இதில் ஒரேயொரு பெண் எம்.பியான பவித்ரா வன்னியாராச்சியும் கலந்து கொண்டிருந்தார்.
ஆனால் பிரதமர் இடைவிடாது தனது உரையை நிகழ்த்திக் கொண்டிருந்தார்.
பிரதமரின் உரையின்போது உள்ளூராட்சி சபைகளில் பெண்களின் பிரதிநிதித்துவத்தை அதிகரிப்பதை எதிர்த்து எதிர்த்தரப்பினர் சபை மத்தியில் கூச்சலிட்டனர்.
இதற்கு ஆதரவாக பெண் எம்.பி.யான பவித்ரா வன்னியாராச்சியும் குரல் எழுப்பினார்.
எதிரணியினரின் இக் கூச்சல் குழப்பத்திற்கு மத்தியில் ஆளுந்தரப்பில் அமைச்சர்களான ரவி கருணாநாயக்க, சந்திராணி பண்டார, அனோமா கமகே, ஜயந்த கருணாதிலக, அகிலவிராஜ் காரியவசம் போன்ற ஆளுந் தரப்பினர் கைதட்டி ஆரவாரம் செய்தனர்.
பிரதமரின் உரைக்குப் பின்னர் உள்ளூராட்சிச் சபை தேர்தல் திருத்த சட்டமூலம் மீது அமைச்சர்களாக சத்திராணி பண்டார, அனோமா கமகே, பைசர் முஸ்தபா மற்றும் தமிழ்த் தேசிய கூட்டமைப்பு எம்.பி. மாவை சேனாதிராஜா ஆகியோர் சபையில் கூச்சல் குழப்பத்திற்கு மத்தியிலும் உரையாற்றினார்கள்.
இதன்போது அவர்களுக்கான ஒலிவாங்கி முடுக்கிவிடப்பட்டிருந்தது.
இதன் பின்னர் இராஜாங்க அமைச்சர் பாலித ரங்கே பண்டார பேச முயற்சித்த போது, எழுந்து நின்ற சபை முதல்வரும் அமைச்சருமான லக்ஷ்மன் கிரியெல்ல இரண்டாம், மூன்றாம் வாசிப்புக்களிற்கான அறிவிப்பை விடுத்தார். பின்னர் இரு திருத்தங்கள் அறிவிக்கப்பட்டன.
ஜே.வி.பியின் எம்.பி. அநுரகுமார திசாநாயக்க திருத்தத்தை முன்மொழிந்திருந்தார். ஆனால் அது ஏற்றுக்கொள்ளப்படவில்லை.
இறுதியில் கூச்சல் குழப்பத்திற்கு மத்தியில் அரசாங்கத்தின் உள்ளூராட்சி சபைத் தேர்தல்கள் சட்ட மூலம் திருத்தங்களுடன் நிறைவேற்றப்பட்டது.
மாலை மூன்று மணிக்கு சபை அடுத்த நாள் (இன்று) புதன்கிழமை நண்பகல் 1.30 மணி வரை ஒத்திவைக்கப்பட்டது.