இந்தியா – இலங்கைக்கு இடையில் பாலம் அமைக்கப்பட்டால் அது வடக்கு, கிழக்கையும் இந்தியாவையும் இணைப்பதாக அமையும். எனவே இந்தியா- இலங்கைக்கு இடையில் பாலம் ஒன்றை அமைத்தால் அதனை தகர்ப்பேன் என பாராளுமன்ற உறுப்பினரும் தூய்மையான ஹெல உறுமயவின் தலைவருமான உதய கம்மன்பில தெரிவித்தார்.
கொழும்பு பாகொடையில் அமைந்துள்ள தூய்மையான நாளைக்கான அமைப்பின் தலைமை அலுவலகத்தில் இடம்பெற்ற ஊடகவியலாளர் சந்திப்பிலேயே அவர் மேற்கண்டவாறு தெரிவித்தார்.
அவர் மேலும் கூறுகையில்,
ஆசிய அபிவிருத்தியின் உதவியில் இலங்கை–இந்தியாவை நிரந்தரமாக இணைக்கும் ஹனுமான் பாலம் அமைக்கப்படும் என்பது தொடர்பில் நாம் முன்னரே அறிவித்திருந்தோம். அதற்காக 5.2 பில்லியன் டொலர் கடனையும் இந்தியா ஆசிய அபிவிருத்தி வங்கியிடத்தில் கோரியுள்ளது.
அது தொடர்பில் பாராளுமன்ற உரையில் அமைச்சர் லக் ஷ்மன் கிரியெல்ல பாலம் அமைக்கப்படாது என்றும் இது உண்மைக்கு புறம்பான விடயம் என்றும் கூறினார். ஆனால் அதற்கு பின்னர் சில நாட்கள் சென்றதும் இந்தியாவின் பெருந்தெருக்கள் அமைச்சர் இந்த பாலம் அமைக்கப்படும் என்று கூறியிருந்தார்.
அப்போது அது தொடர்பில் நாம் அமைச்சர் லக் ஷ்மன் கிரியெல்லவிடத்தில் கேள்வி எழுப்பியிருந்த போதும் அவர் மறுப்பு தெரிவித்திருந்தார். எவ்வாறாயினும் இருவரில் ஒருவர் பொய் கூறியுள்ளனர். அவ்வாறு இல்லாவிட்டால் இந்தியாவின் ஆக்கிரமிப்பு எமது நாட்டின் மீது உள்ளது.
ஆனால் பிரதமர் இந்த விடயம் தொடர்பில் அலட்டிக்கொள்ளவில்லை. தேசிய பாதுகாப்பு தொடர்பில் பிரதமரின் அசமந்த போக்கையே இது காண்பிக்கின்றது. ஆனால் விடயத்தின் உண்மையான நிலைப்பாடு தொடர்பில் அமைச்சர் கபீர் ஹாசீம் எமக்கு தெளிவுபடுத்தியுள்ளார்.
இந்தோனேஷியாவின் ஜகார்த்தா நகரில் இடம்பெற்ற 12 ஆவது இஸ்லாமிய பொருளாதார மாநாட்டில் கலந்து கொண்ட அமைச்சர் கபீர் ஹாசீம் கேட்கப்பட்ட கேள்வி ஒன்றுக்கு அவர் பதிலளித்த வேளை, இந்தியா மற்றும் இலங்கைக்கு இடையில் பாலம் அமைப்பது தொடர்பாக தகவல் வெளியிட்டுள்ளார்.
இந்தப் பாலத்தின் மூலம் இலங்கை மற்றும் இந்தியா இணைக்கப்படும் எனக் கூறிய போதும், உண்மையில் வடக்கு மற்றும் இந்தியாவின் தமிழ்நாடு ஆகிய பகுதிகளே இணைக்கப்படும்.
இந்தியாவில் வேலையற்றோர் தொகை 50 மில்லியனாகவும் இலங்கையின் மொத்த சனத் தொகை 21 மில்லியனாகவும் உள்ளது. இதனால் இந்தியாவிலுள்ள வேலையற்றவர்கள் இலங்கைக்கு வருவார்கள். அதேபோல், தமிழ்நாட்டினர் இடைவிடாது வடக்கிற்கு வருவார்கள். இதனால் சிங்களவர்களுக்கு இருக்கும் ஒரே ஒரு நாட்டையும் இழக்கும் ஆபத்து ஏற்படலாம்.
இவ்வாறு பல பிரச்சினைகள் உள்ள இந்தப் பாலத்தை நிர்மாணிக்கும் நடவடிக்கைகளை மேற்கொள்ளக் கூடாது. அவ்வாறு நிர்மாணிப்பதாயின் நிச்சயம் மக்கள் வாக்கெடுப்பு அவசியம். அவ்வாறு இல்லாது பாலம் நிர்மாணிக்கப்படுமாயின் தேசிய பாதுகாப்பு என்ற பெயரில் அதனை தகர்க்க நடவடிக்கை மேற்கொள்வேன் என்றார்.