ad34@hFacMC 
இலங்கைக்கு ஆதரவு வழங்கும் பாகிஸ்தான், இந்தியா, ஆப்கானிஸ்தான் போன்ற நாடுகளை எமது அரசாங்கத்துடன் மோதவிடும் சதித்திட்டமே போதை வஸ்தை முதன்மைபடுத்தி எதிர்க்கட்சி கொண்டு வந்துள்ள நம்பிக்கையில்லா பிரேரணையாகும். எனவே அகில இலங்கை மக்கள் காங்கிரஸ் இப் பிரேரணைக்கு எதிராக வாக்களிக்கும் என கைத்தொழில் மற்றும் வணிகத்துறை அமைச்சர் ரிஷாத் பதியுதீன் சபையில் தெரிவித்தார்.
பாராளுமன்றத்தில் நேற்று செவ்வாய்க்கிழமை (21-05) இடம்பெற்ற ஐ.தே.கட்சி அரசுக்கெதிராக முன்வைத்த நம்பிக்கையில்லாப் பிரேரணை விவாதத்தில் கலந்து கொண்டு உரையாற்றுகையிலேயே அமைச்சர் ரிஷாட் பதியுதீன் இவ்வாறு தெரிவித்தார்.
அமைச்சர் சபையில் தொடர்ந்து உரையாற்றுகையில், ஜெனீவாவில் எமக்கு எதிராக பிரேரணை கொண்டு வரப்பட்ட போது எமக்கு ஆதரவு வழங்கிய நாடுகள் தான் பாகிஸ்தான், இந்தியா, ஆப்கானிஸ்தான்.
இன்று எதிர்க்கட்சி எமக்கு ஆதரவு வழங்கிய நாடுகளின் பெயர்களை சபையில் வெளியிட்டு போதைவஸ்தோடு தொடர்புபடுத்தி நம்பிக்கையில்லா பிரேரணையில் உரையாற்றுகின்றது.
இது திட்டமிடப்பட்ட செயலாகும். எமக்கு ஆதரவு வழங்கும் நாடுகளை அரசுடன் மோத வைத்து ஆதரவுக்கு பங்கம் விளைவிக்கும் எதிர்க்கட்சியின் சதித்திட்டமாகும். எனவே, இதனை நாம் எதிர்க்கின்றோம். அன்று விடுதலைப்புலிகளால் முஸ்லிம் மக்கள் விரட்டியடிக்கப்பட்டனர்.
முஸ்லிம்கள் வடக்கிலிருந்து இடம் பெயர்ந்து 20 வருடங்களுக்கும் மேலாகி விட்டது. ஆதலால் எமது மக்கள் வாழ்ந்த இடங்கள் இன்று காடு மண்டிக் கிடக்கின்றன.
அவற்றை சுத்தம் செய்து அம் மக்களை மீள் குடியேற்றுவதற்கு நடவடிக்கைகள் எடுக்கப்படும் போது அதனை காடுகளை அழிப்பதாக பொய் பிரச்சாரம் செய்து பொதுபல சேனா போன்ற அமைப்புகளை தூண்டி விட்டு முஸ்லிம்களின் மீள் குடியேற்றம் தடுக்கப்படுகிறது.இது மிகவும் கவலைக்குரிய விடயமாகும்.
திவிநெகும திட்டத்தால் வடக்கின் விவசாயிகள் உட்பட 10 இலட்சத்திற்கும் மேலானோர் நன்மையடைந்தார்கள். உள்ளூர் உற்பத்திகள் அதிகரித்துள்ளது. இவ்வாறானதொரு சூழ்நிலையில் அரசுக்கு எதிராக செயற்படும் மேற்கு நாடுகளுக்கு துணைபோகும் விதத்தில் எதிர்க்கட்சி நம்பிக்கையில்லா பிரேரணையை கொண்டு வந்துள்ளது.
எனவே அகில இலங்கை மக்கள் காங்கிரஸ் இதனை எதிர்த்து வாக்களிக்கும் என்றும் அமைச்சர் ரிஷாட் தெரிவித்தார். (ஜே.ஜி.ஸ்டீபன், ப.பன்னீர்செல்வம் நன்றி விரகேசரி 21-05-2014)