ad34@hFacMC 
பாராளுமன்றத்தில் எதிர்க்கட்சித் தலைவர் பதவியை பெறுவதற்கான பெரும்பான்மை பலம் எங்களிடமே இருக்கின்றது. எனவே, எதிர்வரும் ஏழாம் திகதி சபாநாயகர் வெளியிடும் அறிவிப்புக்காக நாங்கள் காத்திருக்கின்றோம் என்று மக்கள் ஐக்கிய முன்னணியின் தலைவரும் முன்னாள் அமைச்சருமான தினேஷ் குணவர்த்தன தெரிவித்தார்.
பெரும்பான்மை பலமில்லாத ஒருவரை எதிர்க்கட்சித் தலைவராக சபாநாயகர் அறிவிக்க முடியாது என்றும் அவர் குறிப்பிட்டார். எதிர்க்கட்சித் தலைவர் விவகாரம் குறித்து குறிப்பிடுகையிலேயே அவர் மேற்கண்டவாறு குறிப்பிட்டார்.
ஐக்கிய தேசிய கட்சியும் சிறிலங்கா சுதந்திரக் கட்சியும் இணைந்து தேசிய அரசாங்கத்தை அமைத்துள்ள நிலையில் எதிர்க்கட்சி தலைவராக உள்ள நிமால் சிறிபால டி. சில்வா அந்த பதவியை வகிக்க முடியாது என்று கூறப்பட்டுவருகின்றது. இதேவேளை ஐக்கிய மக்கள் சுதந்திர முன்னணியின் சார்பில் பாராளுமன்றத்தில் எதிர்க்கட்சித் தலைவராக மக்கள் ஐக்கிய முன்னணியி்ன் தலைவர் தினேஷ் குணவர்த்தனவை நியமிக்கவேண்டும் என்றும் கோரிக்கை விடுக்கப்பட்டுவருகின்றது.
மக்கள் ஐக்கிய முன்னணியின் தலைவரும் முன்னாள் அமைச்சருமான தினேஷ் குணவர்த்தன இந்த விடயம் குறித்து மேலும் குறிப்பிடுகையில்,பாராளுமன்றத்தில் எதிர்க்கட்சித் தலைவர் யார் என்ற கேள்வி தற்போது மிகப்பெரிய விவகாரமாக எழுந்துள்ளது. இந்நிலையில் என்னை எதிர்க்கட்சித் தலைவராக்கும்படி சிலர் கோரிக்கை விடுக்கின்றனர்.
என்னை எதிர்க்கட்சித் தலைவராக சபாநாயகர் அறிவித்தால் அதற்கான செயற்பாடுகளை மேற்கொள்ளவும் அந்த வகிபாகத்தை வகிக்கவும் நான் தயாராக இருக்கின்றேன்.
இதேவேளை தமிழ்த் தேசியக் கூட்டமைப்பின் தலைவர் சம்மந்தனை எதிர்க்கட்சித் தலைவராக அறிவிக்க முடியாது. காரணம் தமிழ்த் தேசியக் கூட்டமைப்பு தேசிய நிறைவேற்று சபையில் அங்கம் வகிக்கின்றது. எனவே கூட்டமைப்பின் தலைவர் எதிர்க்கட்சித் தலைரவாக வர முடியாது.
மேலும் சிறிலங்கா சுதந்திரக் கட்சி தேசிய அரசாங்கத்தில் பங்கெடுத்திருந்தாலும் ஐக்கிய மக்கள் சுதந்திர முன்னணியின் ஏனைய பங்காளிக் கட்சிகள் எதுவும் இணைந்துகொள்ளவில்லை.
எனவே எமக்கே பாராளுமன்றத்தில் எதிர்க்கட்சித் தலைவர் பதவியை பெறுவதற்கான பெரும்பான்மை பலம் உள்ளது. எனவே எதிர்வரும் ஏழாம் திகதி சபாநாயகர் வெளியிடும் அறிவிப்புக்காக நாங்கள் காத்திருக்கின்றோம். பெரும்பான்மை பலமில்லாத ஒருவரை எதிர்க்கட்சித் தலைவராக சபாநாயகர் அறிவிக்க முடியாது என்றார்.
-VK-